ආසියානු ක්‍රීඩා උළෙලේදී පළමු තරගයට මුහුණ දුන් ශ්‍රී ලංකා කාන්තාවෝ අද (22 වැනිදා) පැවැති තරගයකදී තායිලන්ත කාන්තා කණ්ඩායම පරාජය කරමින් කඩුලු 8 ක පහසු ජයක් අත්කර ගත්හ. මෙම ජයත් සමගින් ශ්‍රී ලංකා ක්‍රීඩිකාවෝ ආසියානු ක්‍රීඩා උළෙලේ ක්‍රිකට් තරගාවලියේ අවසන් පූර්ව වටයට සුදුසුකම් ලබාගත්හ.
වර්ෂාවෙන් බාධා ඇතිවූ හෙයින් මෙම තරගය ඕවර 15 කට සීමා විය. ශ්‍රී ලංකාව සහ තායිලන්තය අතර තරගය ෂේජියැං විශ්ව විද්‍යාලයීය ක්‍රීඩාංගණයේදී පැවැත්විණ.
පළමුවෙන් පන්දුවට පහර දුන් තායිලන්ත කාන්තා කණ්ඩායමේ කඩුලු 6 ක් ලකුණු 37 කට බිඳ වැටුණ නමුත් චනිදා සුතිරුවැන්ග් (නොදැවී 31) සහ පනීතා මායා එක්ව ලකුණු සංඛ්‍යාව 66 දක්වා ගෙන ගියහ. ඕවර 15 ක් අවසානයේදී ඔව්හු කඩුලු 7 කට 78 ක් ලබාගත්හ.
ශ්‍රී ලංකා ක්‍රීඩිකාවෝ ඕවර 10.2 කදී අපේක්‍ෂිත ඉලක්කය කරා අවතීර්ණ වූහ. තරගය අවසන් වන විට ශ්‍රී ලංකා ඉනිමේ පන්දු 28 ක් ඉතිරිව තිබිණ. තරගය අවසන් කරමින් හර්ෂිතා සමරවික්‍රම ගැසූ හයේ පහරත් සමගින් ශ්‍රී ලංකා කාන්තා කණ්ඩායමේ ලකුණු සංඛ්‍යාව 84 ක් විය.
ඉරිදා (24 වැනිදා) පැවැත්වෙන පළමු අවසන් පූර්ව තරගයේදී ඉන්දියාව සහ බංග්ලාදේශය තරග වදින අතර දෙවැනි අවසන් පූර්ව තරගයේදී ශ්‍රී ලංකාව සහ පාකිස්තානය තරග වදිනු ඇත.
“අපිට රන් පදක්කම ඕනා” යයි ශ්‍රී ලංකා කණ්ඩායමේ පුහුණුකරු රුමේෂ් රත්නායක මහතා ඒ.එෆ්.පී. පුවත් සේවයට පවසා තිබිණ.
ආසියානු කලාපයේ ඉදිරියෙන් සිටින කාන්තා ක්‍රිකට් කණ්ඩායම් වන ඉන්දියාව, පාකිස්තානය, ශ්‍රී ලංකාව සහ බංග්ලාදේශය, ආසියානු ක්‍රීඩා උළෙලේදී ශ්‍රේණිගත කණ්ඩායම් ලෙසින් එක එල්ලේම අර්ධ අවසන් පූර්ව වටයට ක්‍රීඩා කළහ. මැලේසියාව, ඉන්දුනීසියාව, තායිලන්තය සහ හොං කොං අර්ධ අවසන් පූර්ව වටයට සුදුසුකම් ලබාගත් සෙසු කණ්ඩායම් වූහ.
හොං කොං සහ බංග්ලාදේශය අතර අද පැවැති අනෙක් අර්ධ අවසන් පූර්ව තරගය වර්ෂාවට සේදී ගිය හෙයින් බංග්ලාදේශය අවසන් පූර්ව වටයට සුදුසුකම් ලබාගත්තේය. ඊයේ පැවැති අර්ධ අවසන් පූර්ව තරග වලදී ඉන්දියාව සහ පාකිස්තානය ජයගත්හ.
තායිලන්ත කාන්තාවෝ - ඕවර 15 කදී කඩුලු 7 ක් දැවී 78 යි
(චනිදා සුතිරුවැන්ග් නොදැවී 31, ඉනෝෂි ප්‍රියදර්ශනී 10/4)
ශ්‍රී ලංකා කාන්තාවෝ - ඕවර 10.2 කදී කඩුලු 2 ට 84 යි
(චමරි අතපත්තු 27, අනුෂ්කා සංජීවනී 32, හර්ෂිතා සමරවික්‍රම නොදැවී 14, තිපාචා පුත්වොංග් 21/2)
- 213
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
