(නාමල් පතිරගේ )
අගෝස්තු 18 වැනිදා පැවැත්වීමට නියමිත ශ්‍රී ලංකා මලල ක්‍රීඩා ආයතනයේ (2025 - 27) නිලවරණයේදී සභාපති ධූරයට නාම යෝජනා තුනක් ඉදිරිපත්වී තිබේ. මලල ක්‍රීඩා ආයතනයේ එළඹෙන නිලවරණයේදී 17 දෙනෙකුගෙන් සමන්විත නව විධායක සභාව පත් කර ගැනීම සදහා නාමයෝජනා කැදවීම ඊයේ (29) අවසන් විය.
ඒ අනුව සභාපති ධූරයට හිටපු සභාපතිවරයෙකු වන සුනිල් ගුණවර්ධන, වෙළද සේවා මලල ක්‍රීඩා සංගමයේ සභාපති ප්‍රසන්න ඉන්දික හා ජාතික මලල ක්‍රීඩා තේරීම් කමිටුවේ වත්මන් සභාපති, හිටපු නියෝජ්‍ය පොලිස්පති උපාලි කුමාරසිරි යන මහත්වරු එසේ සභාපති ධූරයට නාමයෝජනා භාර දුන්නෝ වෙති.
ප්‍රධාන ලේකම් ධූරය සදහා හිටපු කෙටි ධාවන ශූර ෂෙහාන් අඹේපිටිය, එන්.එස්.ඒ.එම්.බී.සෙනෙරත් හා වෛද්‍ය ධම්මික සේනානායක යන මහත්වරු නාමයෝජනා බාරදී තිබේ. භාංඩාගාරික ධූරය සදහා එච්. ආර්.කේ.හේවගේ මහතාගේ නාම යෝජනාව පමණක් ඉදිරිපත්ව තිබෙන බැවින් ඔහු ඊට නිතරගයෙන් පත්වීමට නියමිතය.
නිලවරණයෙන් පත් කර ගන්නා උප සභාපති ධූර දෙක සදහා නාමයෝජනා අටක් ඉදිරිපත්ව තිබේ. කෙසේවූවත් උප භාංඩාගාරික ධූරයට එස්.එම්. ජයසිංහ මහතාගේ නාමයෝජනාව පමණක් ඉදිරිපත් වීමෙන් ඔහු එම ධූරයට නිතරගයෙන් පත් වේ. උප ලේකම් ධූර දෙකක් සදහා ඉදිරිපත්ව ඇති නාමයෝජනා ගණන පහකි.
මලල ක්‍රීඩා ආයතනයේ අගෝස්තු 18 වැනිදා පැවැත්වෙන නිලවරණයේදී විධායක සභාවේ සභික ධූර නවයක් සදහා ලැබී තිබෙන නාමයෝජනා ගණන 20 කි. හිටපු ආසියානු ශූරතා පදක්කම්ලාභී ප්‍රසන්න අමරසේකර සහ නයන්ති කුමාරි චන්ද්‍රෙස්න ඇතුළු හිටපු මලල ක්‍රීඩක ක්‍රීඩිකාවන් කීප දෙනෙකුද ඒ අතර සිටිති.
හිටපු හෙල්ල විසි කිරීමේ ජාතික ශූරයෙකු වන පී.කේ.අළුවිහාරේ මහතා උප සභාපති හා විධායක සාමාජික යන ධූර දෙකකට නාම යෝජනා බාරදී තිබේ.
නාමයෝජනා සදහා යොමු කෙරෙන විරෝධතා බාර ගැනීම ඊයේම ආරම්භ වූ අතර එය අගෝස්තු 1 වැනිදා දක්වා සිදු කෙරේ. විරෝධතා විභාගයට ගැනීම අගෝස්තු 1වැනිදා සිට 4 වැනිදා දක්වා සිදු කිරීමෙන් අනතුරුව ප්‍රකාශයට පත් කෙරේ.
ශ්‍රී ලංකා මලල ක්‍රීඩා වත්මන් සභාපති විශ්‍රාමික මේජර් ජනරාල් පාලිත ප්‍රනාන්දු හා වත්මන් ලේකම් සමන් කුමාර ගුණවර්ධන යන මහත්වරුන් ජාතික ක්‍රීඩා සංගම් නව රෙගුලාසි වලට අනුකූලව මෙවර නිලවරණයට ඉදිරිපත්වී නැත.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
