(නාමල් පතිරගේ)
ජිබොල්ටාවේදී සැප්තැම්බර් 19 සිට 29 වැනිදා දක්වා පැවැත්වෙන ලෝක යොවුන් දැල්පන්දු (නෙට්බෝල්) තරගාවලියට ශ්‍රී ලංකා කණ්ඩායම නිර්දේශ කර ගැනීමේ තේරීම් තරගයේදී 12 දෙනකුගෙන් සමන්විත ශ්‍රී ලංකා කණ්ඩායම නිර්දේශ කර ගැනීමට දැල්පන්දු ජාතික තේරීම් කමිටුව ඊයේ කටයුතු කර තිබේ. කෙසේවූවත් ඒ සදහා ඊයේ සුගතදාස ගෘහස්ථ පිටියේදී පැවැති විශේෂ තේරීම් තරගයට සහභාගිවී සිටියේ එහි සභාපතිනී පද්මා බැද්දේවිතාන හා කමිටු සාමාජිකා වජිරා පුෂ්පකුමාරී යන මහත්මීන් පමණක් බැවින් ඒ සදහා පාසල් දැල්පන්දු සංගමයේ නිලධාරියකු ද කැඳවා ගත් බව වාර්තාවේ.
ඒ අතර ජාතික ක්‍රීඩා තේරීම් කමිටුව මීට පෙර ප්‍රකාශයට පත් කර තිබූ තේරීම් නිර්නායකයන්ට අනුව කණ්ඩායමේ සංයුතිය පිළිබදව ප්‍රධාන පුහුණුකරු හා තේරීම් කමිටුව තේරීම් පරීක්ෂණයට පෙර එකඟතාවකට පැමිණිය යුතුය යන නියමය එහිදී ක්‍රියාත්මක වී නැත්තේ තරග සංචාරය සදහා මෙතෙක් පුහුණුකරුවන් නිර්දේශ කර නැති බැවිනි. කෙසේ වෙතත් කොරියානු ආසියානු යොවුන් තරග සංචාරයේදී ශ්‍රී ලංකා කණ්ඩායමේ ප්‍රහුණුකරුවන් බඳවා ගැනීම සදහා ක්‍රීඩා සංවර්ධන දෙපාර්තමේන්තුව විසින් ප්‍රසිද්ධ කළ පුවත්පත් දැන්වීමේ සඳහන් වූයේ ඉහත තරග සංචාර දෙකම ඉලක්ක කරමින් පුහුණුකරුවන් බඳවා ගන්නා බවයි.
පසුගිය ජූලි 4 වැනිදා කොරියාවේදී නිමාවට පත්වූ ආසියානු දැල්පන්දු තරගාවලියට නිර්දේශ කළ ශ්‍රී ලංකා කණ්ඩායමේ ක්‍රීඩිකාවන් 15 දෙනා සමග වයස 19 න් පහළ සංචිතයේ ක්‍රීඩිකාවන් 12 දෙනකු ඊයේ සංචිතයට කැඳවීම් ලබා තිබේ.
එහෙත් කොරියාවේදී ශ්‍රී ලංකා කණ්ඩායමට ක්‍රීඩා කළ උප නායිකා අනුත්තරා කළුආරච්ච්, භාෂී උඩවත්ත, මිහිදුම් කීර්තිසිරි, ශැනෝන් ද සිල්වා, මිනාගී කන්කානීගේ විභාග කටයුතු ආදී හේතුන් කීපයක් මත ඊයේ තේරීම් තරගයට සහභාගීවී නැත.
කෙසේවූවත් ආසියානු යොවුන් තරග සංචාරයට නිර්දේශ වුණු ශ්‍රී ලංකා කණ්ඩායමේ සෙසු ක්‍රීඩිකාවන් හා ඊට අතිරේක ක්‍රීඩිකාවන් ලෙස නම් කර සිටි ක්‍රීඩිකාවන් දෙදෙනකුත් ජිබොල්ටා ලෝක යොවුන් ශ්‍රී ලංකා කණ්ඩායමට නිර්දේශ ලබා ගැනීමට සමත්ව සිටිති.
ඒ අතර මෙතෙක් ජිබොල්ටා ලෝක යොවුන් තරග සංචාරය සදහා ශ්‍රී ලංකා කණ්ඩායමේ පුහුණුකරුවන් නිර්දේශ කර නොමැති තත්වයක් තුළ ඒ සදහා වයඹ පළාතේ නම ගිය පුහුණුකාරිණියන් කීපදෙනකුම උනන්දුවී සිටින බවත් මේ අතර වාර්තාවේ.
ඊයේ පැවැති තේරීම් තරග සදහා ක්‍රීඩිකාවන්ට ප්‍රමාණවත් පරිදි නිල වශයෙන් කළින් දැනුම්දීමක් කර නොතිබූ බවත් ඒ වෙනුවට කොරියානු ආසියානු යොවුන් තරග සංචාරයට සහභාගි වූ ශ්‍රී ලංකා කණ්ඩායමේ මුල් පෙළේ ක්‍රීඩිකාවක් එම කාර්යයට මැදිහත්ව සිටි බවත් දැල්පන්දු ආරංචි මාර්ග සදහන් කරයි.
සැප්තැම්බර් 20 වැනිදා එංගලන්තයට එරෙහිව තරග වදිමින් ශ්‍රී ලංකාව ජිබොල්ටා ලෝක යොවුන් තරගාවලියට සහභාගි වීම අරඹයි.
ජිබොල්ටා ලෝක යොවුන් දැල්පන්දු තරගාවලියට නිර්දේශ කළ ශ්‍රී ලංකා කණ්ඩායම:
චලනී නීෂා (නිදහස්), නෙතංගා ගුණරත්න (ස්ලිට්), චිතේරා ඔමීනී (හැටන් නැෂනල් බැංකුව), සරණී සමරකෝන් (කුරුණෑගල මලියදේව බාලිකා), මහේෂිකා කාසිවත්ත (කුරුණෑගල මලියදේව බාලිකා) මනෝදා රත්නායක (සෙලාන් බැංකුව), තරින්දි තසාරා (කොළඹ මියුසියස්), කසුනී වත්සලා (සී.ඩී.බී. ෆිනෑන්ස්), දේශානී ඕෂධී (නිදහස්), තුමල්කා ඒකනායක (කුරුණෑගල මලියදේව බාලිකා), මහේෂිකා කුලරත්න (මහනුවර මහමායා බාලිකා) හා විනුජී ගුණවර්ධන (කොළඹ මියුසියස්)
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
