(නාමල් පතිරගේ )
ශ්‍රී ලංකාවේ උත්තේජක මර්දන නීති මාලාව තුන් වැනි වතාවටත් සංශෝධනය කිරීමෙන් පසුව කැබිනට් මණ්ඩලය විසින් අනුමත කර ගැසට් නිවේදනය සදහා රජයේ මුද්‍රණාලය වෙත යොමු කර ඇතැයි ශ්‍රී ලංකා උත්තේජක මර්දන නියෝජිත ආයතනය (ස්ලාඩා) පවසයි.
එහිදී ගැසට් කරන ලද එම උත්තේජක නීති මාලාව පාර්ලිමේන්තුවේදී සම්මත කර ගැනීම ඉදිරි මාස දෙකක කාලය තුළදී අවසන් කිරීමට බලාපොරොත්තු වන බවත් ශ්‍රී ලංකා උත්තේජක මර්දන නියෝජිත ආයතනය (ස්ලාඩා) පවසයි. කෙසේ වෙතත් ශ්‍රී ලංකා උත්තේජක මර්දන නියෝජිත ආයතනයට ලෝක උත්තේජක මර්දන නියෝජිත ආයතනය (වාඩා) විසින් දැනට පනවා තිබෙන තහනමෙන් ශ්‍රී ලංකාවේ ක්‍රීඩකයන්ට අන්තර් ජාතික තරග වලට සහභාගි වීමට හෝ ශ්‍රී ලංකාව දැනට සත්කාරකත්වය ලබා තිබෙන ජාත්‍යන්තර තරගාවලි පැවැත්වීමට කිසිදු බාධාවක් පැන නැගී නැතැයිද ශ්‍රී ලංකා නියෝජිත ආයතනය පවසයි.
අගෝස්තු 18 වැනිදා සිට ලෝක උත්තේජක මර්දන නීතිය යාවත්කාළීන නොකිරීමේ චෝදනාව මත ශ්‍රී ලංකාවට ලෝක නියෝජිත ආයතනය විසින් තහනමක් පනවා තිබීම සම්බන්ධයෙන් එම කරුණු පැහැදිළි කිරීම කර තිබේ.
අදාළ උත්තේජක මර්දන නීති සංශෝධනය කිරීම් පසුගිය 2024 ජූනි 18 වැනිදාට පෙර සිදු කරන ලෙස ලෝක නියෝජිත ආයතනය විසින් ශ්‍රී ලංකාවට දැනුම්දී තිබියදී ඇතිවූ ප්‍රමාද තත්වයන්ට හේතු වූයේ ශ්‍රී ලංකාවේ මැතිවරණ සමයක් පැවැතීමය. කෙසේ වූවත් නීතිපති දෙපාර්තමේන්තුව සම්බන්ධ කර ගනිමින් කෙටුම්පත සම්පාදනය සාර්ථක කර ගැනීම සදහා දෙපාර්ශවය අතර සාකච්ඡා රැසක් පැවැත්වුණි.
එහිදී 2025 මැයි 16 වැනිදා කෙටුම්පත් සම්පාදනයේදී මතුවූ ගැටළු නිරාකරණය කර ගැනීමට ලෝක නියෝජිත ආයතනයේ නියෝජිතයෙකුද ශ්‍රී ලංකාවට කැදවා ගනු ලැබූ අතර නීතිපති දෙපාර්තමේන්තුව හැරෙන්නට මෙම කටයුත්තට නීති කෙටුම්පත් සම්පාදක දෙපාර්තමේන්තුවද සම්බන්ධ විය. ඒ අනුව සියළු පාර්ශව එකගතාවයෙන් උත්තේජක ගැනීමට එරෙහි සම්මුති (සංශෝධන) නීති පනතේ කෙටුම්පත සම්පාදනය කළ බවත් ශ්‍රී ලංකා උත්තේජක මර්දන නියෝජිත ආයතනය වැඩිදුරටත් පවසයි.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
