විනේ කුමාර්ගේ විශිෂ්ට පන්දු රැකීමකින් වීරරත්නගේ සටන්කාමී ඉනිම නිමාවෙයි. ශ්‍රී ලංකා ලෙජන්ඩ්ස් පිලට දැන් තියෙන ඉලක්කය - පන්දු 6 කින් ලකුණු 24 ක් 

වීරරත්නගේ හයේ පහර දෙකකින් තරගය යළිත් සමබර වෙයි.
ශ්‍රී ලංකා ලෙජන්ඩ්ස් පිලට දැන් තියෙන ඉලක්කය - පන්දු 12 කින් ලකුණු 30 ක්.

ශ්‍රී ලංකා ලෙජන්ඩ්ස් පිලට දැන් තියෙන ඉලක්කය - පන්දු 18 කින් ලකුණු 49 ක් 

ශ්‍රී ලංකා ලෙජන්ඩ්ස් පිලට දැන් තියෙන ඉලක්කය - පන්දු 24 කින් ලකුණු 58 ක් 

ශ්‍රී ලංකා ලෙජන්ඩ්ස් පිලට දැන් තියෙන ඉලක්කය - පන්දු 30 කින් ලකුණු 66 ක් 

ශ්‍රී ලංකා ලෙජන්ඩ්ස් පිලට දැන් තියෙන ඉලක්කය - පන්දු 36 කින් ලකුණු 79 ක් 

ප්‍රහාරාත්මක ඕවර 6 නිමාවෙන් පසුව තවමත් හතරේ පහරක් නෑ. ඒත් කඩුලු දෙකක්.. ඩිල්ෂාන් සහ චාමර සිල්වා

ඉන්දීය ලෙජන්ඩ්ස්ලා උපක්‍රමශීලී විවේකය ගත්තේ ශ්‍රී ලංකා පිතිකරුවන්ගේ ගමන අඩාල කරන්නද ?... ඉන්දියානුවන් අපේක්‍ෂා කළ පරිදිම පන්දු දෙකකට පසුව තිලකරත්න ඩිල්ෂාන් දැවී යයි. ඩිල්ෂාන් මෙම තරගාවලියේදී ලබාගත් ලකුණු සංඛ්‍යාව 261 ක් 

ඩිල්ෂාන් - සනත් දෙදෙනාගෙන් විශිෂ්ට ආරම්භයක්..
ඕවර 7 කදී ලකුණු 61 ක්.. ඕවරයකදී ලකුණු 9 කට ආසන්න වේගයක්

කෞෂල්‍ය වීරරත්නගේ දෙවැනි ඕවර ඉතාම සාර්ථක එකකි. එය තරගයේ 19 වැනි වූවත්, නිලකුණු පන්දුවක්ද සමගින් ලකුණු 7 කට ඕවරය සීමාකරගත් තුන් ඉරියව් ක්‍රීඩකයා වඩාත්ම භයානක පිතිකරුවා වූ යුවරාජ් සිං පිටියෙන් ඉවත් කරගත්තේය.
තවත් හයේ පහරකට උත්සුක වූ යුවරාජ්ගේ පිත්තෙන් පිටත් වූ පන්දුව අහසේ ඉතා ඉහළින් ගොස් ඩීප් ලෝන්ග් ඕන් හි සිටි මහරුෆ් අත තැන්පත් වූයේය. 

මහරුෆ්ගෙන් ඉතාම සාර්ථක පන්දු යැවීමක්. පන්දුවේ මැස්ම මැනවින් උපයෝගී කරගත් තුන් ඉරියව් ක්‍රීඩකයා වරින් වර පන්දුවේ වේගය වෙනස් කරමින් පිතිකරුවන් මුළා කළේය. සිය ඕවර 4 නිමා වන විට මහරුෆ් දී තිබුණේ ලකුණු 16 ක් පමණි. ඕවරයකදී ලකුණු 4 කි.

කුලේ තුන්වැනි ඕවරයේදීත් දරුණු ප්‍රහාරයකට ලක්වෙයි. ඉර්ෆාන් පතන්ගෙන් හයේ පහර දෙකක් සහ යුවරාජ්ගෙන් හයේ පහරක්. .. ඕවර 2 කදී ලකුණු 12 ක් පමණක් දී තිබූ කුලසේකරගෙන් තුන්වැනි ඕවරය නිමාවේදී ලබාගෙන තිබූ ලකුණු සංඛ්‍යාව 32 කි. 

ඕවර 3 ක් ලකුණු 20 කට සීමාකරගෙන සිටි ධම්මික ප්‍රසාද්ට දරුණු ප්‍රහාරයක්. ධම්මිකගේ අවසන් ඕවරයේදී හයේ පහර දෙකක්, හතරේ පහර දෙකක් ඇතුළුව ලකුණු 22 ක්... 

අතිරේක ක්‍රීඩක දුලන්ජන විජේසිංහට රැකගත හැකිව තිබූ යූසුෆ් පතන්ගේ උඩපන්දුවක් ලකුණු 6 ක් වෙයි. දුලංජන ඉතා හොඳින් උඩ පන්දුව වෙනුවෙන් ස්ථානගත වූවත්, පන්දුව ඔහුගේ දෑත් අතරින් ලිස්සා හතරේ සීමාවට ඉහළින් යයි. 

කුලේගෙත් තවත් සාර්ථක ඕවරයක්. ලකුණු 5 යි.

මහරුෆ්ගෙන් විශිෂ්ට පන්දු යැවීමක්. ඕවර 2 යි. ලකුණු 5 යි . තෙන්ඩුල්කාර්ගේ කඩුල්ලයි.

ඩිල්ෂාන්ගේ කෙටි පන්දු දෙකක් යුවරාජ් විසින් හතරේ සීමාවට ඉහළින් යවයි. එවැනිම පන්දුවක් තෙන්ඩුල්කාර්ට යැවූ නමුත් පුල් පහරකින් තෙන්ඩුල්කාර් ලබාගත්තේ එක ලකුණක් පමණි. එයින් පන්දුවට පහර දීමේ අවස්ථාව ලබාගත් යුවරාජ් පන්දු 5 කින් ලකුණු 14 ක් උදුරා ගත්තේය. 

මහරුෆ් පන්දුවේ මැස්ම මැනවින් උපයෝගී කරගනිමින් පිතිකරුවන් මුළා කරගනී. ඔහුගේ පන්දු 6 ටම ලකුණු 4 ක් පමණයි.

සචින් තෙන්ඩුල්කාර් පන්දු 17 කින් 22 යි. පිට ඉන්නට එපිටින් වැටුණේ එකම පන්දුවයි. අලංකාර කවර් ඩ්‍රයිව් පහරකින් පන්දුව වේගයෙන් හතරේ සීමාවට ඇදී යද්දී කෞෂල්‍ය වීරරත්නගෙන් විශිෂ්ට පන්දු රැකීමක්. නිසැක වශයෙන්ම ලකුණු 3 ක් නවත්වාගනී. පන්දු රැකීමේ විශිෂ්ට කැපවීමක්..

කොරෝනා තත්ත්වයේ අඩුවක් නැතිව තිබියදීත් ක්‍රීඩාංගණය පිරෙන්නම ප්‍රේක්ක්‍ෂකයෝ... කුඩා දරුවන් වඩාගත් මව්වරුත් සිටිති.

සනත් ජයසූරිය - රංගන හේරත් - ධම්මික ප්‍රසාද් ඉතාම විශිෂ්ට පන්දු යැවීමක.. ආයෙත් ජාතික කණ්ඩායමට සෙල්ලම් කරන්න පුළුවන් වාගෙයි.

කඩුල්ල මුවාකිරීමේ වරදට හසුවෙමින් එස්. බද්‍රිනාත් දැවීයයි.

පන්දුව කඩුල්ලේ දැවටීමෙන් විරේන්ද්‍ර ෂෙවාග් දැවී යයි.

හතරේ සීමාව දක්වා පන්දුව හඹාගිය රසල් ආනල්ඩ්ට මොකද වුණේ... පන්දුව හතරේ සීමාවට ගිය පසුව රසල්ගේ කලව මස්පිඬුව තදින් සම්බාහනය කරනු දකින්නට ලැබුණා... ඊට පස්සේ ආරංචියක් නෑ..