බ්‍රාස්වෙල්ගේ ශතකය නවසීලන්තයට ජය ගෙනෙයි

මයිකල් බ්‍රාස්වෙල්ගේ අගනා ශතකය හේතුවෙන් අයර්ලන්තය කණ්ඩායමට එරෙහිව ඩබ්ලින්හිදී පැවැති පළමු එක්දින තරගයෙන් කඩුල්ලක තියුණු ජයක් අත්කර ගැනීමට සංචාරක නවසීලන්ත කණ්ඩායම සමත් විය. මෙම ජයත් සමග දෙරට අතර පැවැත්වෙන තරග 3 කින් සමන්විත එක්දින තරගාවලිය 1-0 ක් ලෙස පෙරමුණ ගැනීමටද නවසීලන්තයට හැකි විය.

ජයග්‍රහණය සඳහා ලකුණු 301 ක ඉලක්කයක් හඹාගිය නවසීලන්ත ක්‍රීඩකයෝ එක් පන්දුවක් ඉතිරිව තිබියදී කඩුලු 9 ක් දැවී එම ඉලක්කය පසුකර ගියහ. තරගය ජයගැනීම සඳහා නවසීලන්ත කණ්ඩායමට බ්ලෙයාර් ටික්නර් යැවූ අවසන් ඕවරයේදී ලකුණු 20 ක් රැස්කිරීමට සිදුවිය. එහිදී හයේ පහර 2 ක් සහ හතරේ පහර 3 ක් එල්ල කරමින් සිය කණ්ඩායම ජයග්‍රහණය කරා ගෙන යෑමට බ්‍රාස්වෙල් සමත් විය.

මුල් පෙළ පිතිකරුවන් කිහිපදෙනෙක්ම අසාර්ථක වෙද්දී එක් අන්තයක් රැ‍ගෙන වේගයෙන් ලකුණු රැස්කළ බ්‍රාස්වෙල් පන්දු 82 කදී හයේ පහර 7 ක් සහ හතරේ පහර 10 ක් සමග නොදැවී ලකුණු 127 ක් රැස්කළේය. ඉෂ් සෝධි (25) සමග එක්ව 7 වැනි කඩුල්ල වෙනුවෙන් පන්දු 66 කදී ලකුණු 61 ක සම්බන්ධතාවක් ගොඩනැගූ බ්‍රාස්වෙල්, ඉන් නොනැවතී ලොකී ෆර්ගසන් (8) සමග එක්ව 9 වැනි කඩුල්ල වෙනුවෙන් පන්දු 38 කදී ලකුණු 64 ක සම්බන්ධතාවක්ද ගොඩනැගුවේය.

ආරම්භක පිතිකරු මාටින් ගප්ටින් පන්දු 61 කදී හයේ පහරක් සහ හතරේ පහර 6 ක් සමග ලකුණු 51 ක් රැස්කළේය. අයර්ලන්තය වෙනුවෙන් දක්ෂ පන්දු යැවීමක නිරත වූ කර්ටිස් කැම්පර් ලකුණු 49 කට කඩුලු 3 ක් දවාගැනීමට සමත් වුවද, ඔහුට සිය කණ්ඩායම පරාජයෙන් ගළවා ගැනීමට නොහැකි විය. මාර්ක් අඩෙයර් ලකුණු 43 කට කඩුලු 2 ක් බිඳහෙළීය.

පළමුවෙන් පන්දුවට පහරදුන් අයර්ලන්ත කණ්ඩායම ඕවර 50 අවසානයේ කඩුලු 9 ක් දැවී ලකුණු 300 ක් රැස්කළ අතර එහිදී ශතකයක් ලබාගැනීමට ‍හැරී ටෙක්ටර් (113) සමත් විය. කර්ටිස් කැම්පර් (43) සමග එක්ව ‍සිවුවැනි කඩුල්ල වෙනුවෙන් පන්දු 93 කදී ලකුණු 94 ක සම්බන්ධතාවක් ‍ගොඩනැගූ ටෙක්ටර්, කෙමෙන් කෙමෙන් අයර්ලන්ත කණ්ඩායමේ ලකුණු සංඛ්‍යාව ඉහළ දැමීය.

පන්දු 47 කදී වාර්තා වූ කැම්පර්ගේ ඉනිම හයේ පහරකින් සහ හතරේ පහර 5 කින් සමන්විත විය. ඇන්ඩි මැක්බ්‍රින් පන්දු 58 කදී හයේ පහරක් සහ හතරේ පහර 4 ක් සමග ලකුණු 39 ක්ද, සිමි සිං පන්දු 19 කදී හයේ පහරක් සහ හතරේ පහර 4 ක් සමග ලකුණු 30 ක්ද, ලෝකන් ටකර් පන්දු 22 කදී හයේ පහර 2 ක් සහ හතරේ පහරක් සමග ලකුණු 26 ක්ද රැස්කරමින් අයර්ලන්ත ඉනිම ගොඩනැගීම සඳහා ටෙක්ටර්ට අනගි සහායක් දුන්හ.

අයර්ලන්තය - ඕවර 50 කදී කඩුලු 9 කට 300
(ඇන්ඩි මැක්බ්‍රයන් 39,හැරී ටෙක්ටර් 113, කර්ටිස් කැම්පර් 43, ලෝකන් ටකර් 26, ජෝජ් ඩො‍ක්‍රෙල් 18, සිමි සිං 30, ලොකී ෆර්ගසන් 44/2, ඉෂ් සෝධි 62/2, බ්ලෙයර් ටික්නර් 71/2)

නවසීලන්තය - ඕවර 49.1 කදී කඩුලු 9 කට 305
(මාටින් ගප්ටිල් 51, ටොම් ලේතම් 23, ග්ලේන් පිලිප්ස් 38, මයිකල් බ්‍රාස්වෙල් නොදැවී 127, ඉෂ් සෝධි 25, කර්ටිස් කැම්පර් 49/3, මාක් අඩෙයර් 43/2)

-036