ඉන්දියාවේදී පැවැත්වෙන ‘ලෙජන්ඩ්ස් ලීග්’ ප්‍රවීණයන්ගේ විස්සයි-20 ක්‍රිකට් තරගාවලියේ භිල්වාරා කිංග්ස් කණ්ඩායමට එරෙහිව පැවැති තරගයේදී ලකුණු 31 කට කඩුලු 4 ක් දවාගනිමින් මනිපාල් ටයිගර්ස් කණ්ඩායම ජයග්‍රහණය කරා ගෙන යෑමට ශ්‍රී ලංකා කණ්ඩායමේ හිටපු වේග පන්දු යවන ක්‍රීඩක දිල්හාර ප්‍රනාන්දු සමත් විය.
ලකුණු 176 ක ඉලක්කයක් හඹාගිය කිංග්ස් කණ්ඩායමට ජයග්‍රහණය සඳහා අවසන් ඕවරයේදී ලකුණු 9 ක් අවශ්‍ය විය. එහෙත් කඩුලු 2 ක්ද දවාගනිමින් එම ඕවරය ලකුණු 5 කට සීමා කළ දිල්හාර ප්‍රනාන්දු, තම කණ්ඩායමට ලකුණු 3 ක තියුණු ජයක් අත්කර දුන්නේය.
කඩුල්ලක් දවාගනිමින් සිය පළමු ඕවර 2 ලකුණු 12 කට සීමා කළ දිල්හාර, තමා යැවූ තෙවැනි ඕවරයේදී කිංග්ස් කණ්ඩායමේ නායක ඉර්ෆාන් පතාන්ගේ (23) කඩුල්ලද බිඳහෙළුවේය. අවසන් ඕවරයේදී ලකුණු 9 ක් ආරක්ෂා කර ගැනීම හේතුවෙන් දිල්හාර තරගයේ වීරයා ලෙසද සම්මාන දිනාගත්තේය.
පළමුවෙන් පන්දුවට පහරදුන් ටයිගර්ස් කණ්ඩායම ඕවර 20 අවසානයේ කඩුලු 8 ක් දැවී ලකුණු 175 ක් ලබාගත් අතර එහිදී වේගවත් පිතිහරඹයක නිරත වූ ආරම්භක පිතිකරු ටටෙන්ඩා ටයිබු පන්දු 30 කදී හයේ පහර 4 ක් සහ හතරේ පහර 5 ක් සමග ලකුණු 54 ක් රැස්කළේය.
ටයිගර්ස් ඉනිමේ පළමු කඩුල්ල වෙනුවෙන් ජෙසී රයිඩර් (47) සමග එක්ව පන්දු 64 කදී ලකුණු 109 ක වේගවත් සම්බන්ධතාවක් ගොඩනැගීමටද ටයිබු සමත් විය. පන්දු 35 කට මුහුණදුන් රයිඩර්, හයේ පහර 2 කින් සහ හතරේ පහර 6 කින් සිය ඉනිම සැරසුවේය.
මනිපාල් ටයිගර්ස පිල - ඕවර 20 කදී කඩුලු 8 කට 175
(ජෙසී රයිඩර්ස් 47, ටටෙන්ඩා ටයිබු 54, කෝරි ඇන්ඩසන් 24, මොහොමඩ් කයිෆ් 28, ටීනෝ බෙස්ට් 20/3, යූසෆ් පතාන් 25/2)
භිල්වාරා කිංග්ස් පිල - ඕවර 20 කදී කඩුලු 9 කට 172
(විලියම් පොටර්ෆීල්ඩ් 28, මැට් ප්‍රයර් 17, ටැන්මේ ශ්‍රීවාස්තව් 26, යූස්ෆ් පතාන් 42, ඉර්ෆාන් පතාන් 23, දිල්හාර ප්‍රනාන්දු 31/4, හර්බජාන් සිං 16/2, පර්වින්දර් අවාසා 34/2)
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
