හසිනි - හසාරා රන් පදක්කමක් දිනති

(ශානුක අරවින්ද)

බොට්ස්වානා ජාත්‍යන්තර බැඩ්මින්ටන් තරගාවලියේ කාන්තා යුගල ඉසව්වේ රන් පදක්කම් දිනා ගැනීමට ශ්‍රී ලංකාවේ හසිනි අම්බලන්ගොඩගේ සහ හසාරා විජේරත්න සමත් වූහ. 

අවසන් මහ තරගයේදී වට 2-0 ක් ලෙස ලෝක බැඩ්මින්ටන් ශ්‍රේණිගත කිරීම්හි 72 වැනි ස්ථානයේ පසුවන දකුණු අප්‍රිකාවේ ඇමී ඒකර්මන් සහ ඩයිඩි්‍ර ලොරේන්ස් පරාජය කරමින් හසිනි සහ හසාරා එම පදක්කමට හිමිකම් කීහ. 

කාන්තා යුගල ඉසව්ව පුරා දක්ෂ ලෙස තරග වැදුණු හසිනි සහ හසාරා, එහි අවසන් මහ තරගයේ පළමු වටය ලකුණු 21-18 ක් ලෙස ජයගත් අතර ඉතා තියුණු සටනකින් අනතුරුව දෙවැනි වටය ජයගත්තේ ලකුණු 22-20 ක් ලෙසිනි. 

මෙම තරගාවලියට සහභාගි වීමට පෙර සැම්බියා ජාත්‍යන්තර බැඩ්මින්ටන් තරගාවලියේ කාන්තා යුගල ඉසව්වේ රිදී පදක්කම දිනා ගැනීමටද හසිනි සහ හසරා සමත් වූහ. 

මෙම තරගාවලියෙන් අනතුරුව ඔවුන් දෙදෙනා දකුණු අප්‍රිකානු ජාත්‍යන්තර බැඩ්මින්ටන් තරගාවලියට සහභාගි වීමට නියමිත අතර එම තරගාවලිය මේ මස 28 වැනිදා සිට දෙසැම්බර් 1 දක්වා පැවැත්වේ.