ලකුණු 51 ක් ලබාගනිමින් මහනුවර ක්‍රීඩා සමාජය කල් තියාම අවසන් මහ තරගයේ ස්ථානයක් වෙන්කරවා ගත් බැවින් අවසන් මහ තරගයට සුදුසුකම් ලබාගත හැක්කේ තවත් එක් කණ්ඩායමකට පමණි. මේ වන විට සී.ආර්. කණ්ඩායම ලකුණු 48 ක් ලබා ලකුණු සටහනේ දෙවැනි ස්ථානයේද, සී.එච්. කණ්ඩායම ලකුණු 43 ක් ලබා එහි තෙවැනි ස්ථානයේද රැදී සිටියි. 

 

අවසන් සතියේදී සී.ආර්. කණ්ඩායම මහනුවර කණ්ඩායමට එරෙහිව තරග වැදීමට නියමිත අතර සී.එච්. කණ්ඩායම හැව්ලොක්ස් කණ්ඩායමට එරෙහිව තරග වැදීමට නියමිතය. සී.ආර්. කණ්ඩායමට අවසන් මහ තරගයට පිවිසීම සඳහා එම තරගයේදී මහනුවර කණ්ඩායම පරාජය කිරීම ප්‍රමාණවත් වනු ඇත.  

 

යම් හෙයකින් ඔවුන් මහනුවර කණ්ඩායම හමුවේ පරාජය වන්නේ නම්, ප්‍රසාද ලකුණ සමග පරාජය වීමද අවසන් මහ තරගයට පිවිසීම සඳහා ප්‍රමාණවත් වනු ඇත. එහිදී සී.ආර්. කණ්ඩායම ප්‍රසාද ලකුණ නොමැතිව පරාජයට පත්වන්නේ නම් ඔවුන්ට අවසන් මහ තරගයට පිවිසීම සඳහා සෙසු තරගයේදී හැව්ලොක්ස් කණ්ඩායම හමුවේ සී.එච්. කණ්ඩායම පරාජයට පත්වන තෙක් බලා සිටීමට සිදුවනු ඇත. 

 

සී.එච්. කණ්ඩායමට අවසන් මහ තරගයට සුදුසුකම් ලැබීම සඳහා අවසන් සතියේදී හැව්ලොක්ස් කණ්ඩායම පරාජය කිරීම පමණක් ප්‍රමාණවත් නොවනු ඇත. ඔවුන්ට එම අවස්ථාව උදා කරගැනීම සඳහා සී.ආර්. කණ්ඩායම ප්‍රසාද ලකුණක් නොමැතිව මහනුවර කණ්ඩායම හමුවේ පරාජය වන තෙක් බලා සිටීමටද සිදුවනු ඇත. කුසලාන ශූරතාව සඳහා වන අවසන් මහ තරගය මෙම මස 21 වැනිදා පැවැත්වෙනු ඇත. 

 

මෙම තරගාවලියේදී තරගයක් ජය ගැනිම වෙනුවෙන් කණ්ඩායමකට ලකුණු 5 ක් හිමිවන අතර තරගයක් සම වුවහොත් කණ්ඩායම් දෙකටම ලකුණු 3 බැගින් හිමිවනු ඇත. කණ්ඩායමකට ප්‍රසාද ලකුණක් හිමිවන්නේ තරගයකදී උත්සාහක දිනුම් 4 කට වැඩියෙන් ලබාගතහොත් හෝ ලකුණු 7 කට අඩු පරතරයකින් තරගයක් පරාජයට පත්වුවහොත් පමණි.