(ශානුක අරවින්ද)
ශ්‍රී ලංකා පාසල් රග්බි සංගමය සංවිධානය කරන ඩයලොග් පාසල් රග්බි ලීගයේ පළමු කොටසේ 'ඒ' කාණ්ඩය යටතේ අද (25 වැනිදා) පැවැති තරගයකදී ලකුණු 32-25 ක් ලෙස කටුගස්තොට ශාන්ත අන්තෝනි විදුහල පරාජය කිරීමට ගල්කිස්ස සාන්ත තෝමස් විදුහල සමත් විය.
මේ දක්වා තරග 4 කට ක්‍රීඩා කළ සාන්ත තෝමස් විදුහල මෙවර තරගාවලියේදී ලැබූ පළමු ජය මෙය විය. ශාන්ත අන්තෝනි විදුහලද මේ දක්වා තරග 4 කට ක්‍රීඩා කර ඇති අතර එහිදී ඔවුන් ලැබූ තෙවැනි පරාජය මෙය විය.
කොළඹ හැව්ලොක් ක්‍රීඩාංගණයේදී පැවැති මෙම තරගයේ පළමු අර්ධ අවසන් වන විට ලකුණු 18-10 ක් ලෙස සාන්ත තෝමසුවෝ පෙරමුණ ගත්හ. එහිදී ශාන්ත තෝමස් විදුහල ගෝල දිනුමක්, උත්සහක දිනුමක් සහ දඬුවම් පහර 2 ක් සමගින් ලකුණු රැස්කළේය. ශාන්ත අන්තෝනි විදුහල එහිදී ලකුණු රැස්කළේ ගෝල දිනුමක් සහ දඬුවම් පහරක් සමගිනි.
දෙවැනි අර්ධයේදී සාන්ත තෝමසුවෝ ගෝල දිනුම් 2 ක් මගින් ලකුණු රැස්කරද්දී, ශාන්ත අන්තෝනි විදුහල ගෝල දිනුමක්, උත්සාහක දිනුමක් සහ දඬුවම් පහරක් මගින් ලකුණු රැස්කළේය. කෙසේ වුවත් පළමු අර්ධය අවසානයේ පැවැති ලකුණු පරතරය අනුව නියමිත කාලය අවසන් වන විට ලකුණු 32-25 ක් ලෙස තරගයේ ජය තෝමසුවන් සතුවිය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
