ශ්‍රී සුමංගල විද්‍යාලයට ඉනිමක ජයක්

‘සිංගර් කුසලාන’ වයස 19 න් පහළ ක්‍රිකට් තරගාවලියේ දෙවැනි කොටසේ තරගයකදී හොරණ තක්‍ෂිලා විද්‍යාලයට එරෙහිව ඉනිමක සහ ලකුණු 172 ක ජයක් ලබාගැනීමට පානදුර ශ්‍රී සුමංගල විද්‍යාලය සමත්විය. මෙම තරගය පානදුර නගරසභා ක්‍රීඩාංගණයේදී පැවැත්විණි.

ජනිඳු ඉනුවර (153) ශතකයක්ද මිහිරංග ප්‍රනාන්දු (91) සහ ශන්දිත් ප්‍රනාන්දු (52) අර්ධ ශතක ලබාගනිමින් පිත්තෙන් දස්කම් දැක්වූහ. අනුප ජයසිංහ දෙවැනි ඉනිමේදී ලබාගත් කඩුලු 6 ත් සමගින් කඩුලු 10 ක් දවාගනිමින් තරගය පුරා පන්දුවෙන් දස්කම් දැක්වීය. විශ්ව කුමාර කඩුලු 6 ක් දවාගත්තේය.

තක්‍ෂිලා විද්‍යාලය - පළමු ඉනිම - ඕවර 38 කදී සියලුදෙනා දැවී ලකුණු 111
(සිනෙත් වින්විනු නොදැවී 49, අනුක ජයසිංහ 22/4, විශ්ව කුමාර 26/3, ජනිඳු ඉනුවර 15/2)

ශ්‍රී සුමංගල විද්‍යාලය - පළමු ඉනිම - ඕවර 86.2 කදී සියලුදෙනා දැවී ලකුණු 388
(ජනිඳු ඉනුවර 153, මිහිරංග ප්‍රනාන්දු 91, ශන්දිත් ප්‍රනාන්දු 52, පූර්ණ ප්‍රභාත් 48, සෙනෙත් වින්විනු 91/4, තිළිණ ජීරසිංහ 70/3)

තක්‍ෂිලා විද්‍යාලය - දෙවැනි ඉනිම - ඕවර 35.1 කදී සියලුදෙනා දැවී ලකුණු 105
(එරංග ජයකොඩි 37, අනුප ජයසිංහ 41/6, විශ්ව කුමාර 18/3)