(කරන්දෙණිය එම්.සුසිල් ප්‍රියන්ත)
ක්වීන්ස්ටාර් ජාත්‍යන්තර චෙස් ක්‍රීඩා ඇකඩමිය වාර්ෂිකව සංවිධානය කරනු ලබන ක්වීන්ස්ටාර් ජාත්‍යන්තර ශ්‍රේණිගත කිරීමේ චෙස් තරගාවලිය අගෝස්තු මස 13 සිට 17 දක්වා ගම්පහ වෙට් වෝටර් නිවාඩු නිකේතනයේදී පැවැත්වේ.
විවෘත පිරිමි සහ කාන්තා තරගාවලියට අමතරව ශ්‍රේණිගත ලකුණු ලැබූ හා ශ්‍රේණිගත ලකුණු නොලබූ වශයෙන් ද තරගාවලිය පැවැත්වේ. වයස 6 න් පහළ, 8 න් පහළ, 9 න් පහළ, 11 න් පහළ, 13 න් පහළ, සහ 15 න් පහළ යන වයස් කාණ්ඩවලින් ද තරගාවලිය පැවැත්වෙයි. සෑම වයස් කාණ්ඩයකදීම බාලක හ බාලිකා වශයෙන්ද තරගාවලිය පැවැත්වේ.
තරගාවලිය තරග වට නවයකි. තරග වට නවය තරගාවලිය පැවැත්වෙන දින පහේදී දිනකට තරග වට දෙක බැගින් සිව් දිනක් ද අවසන් දිනයේ එක් තරග වටයක් ද පවත්වා තරග වට නවය නිමාවට පත් කෙරේ.
ජයග්‍රාහකයන්ට සහ ජයග්‍රාහිකාවන්ට රන්, රිදී සහ ලෝකඩ පදක්කම්වලට අමතරව මුදල් ත්‍යාග ද පිරිනැමේ. පිරිනමනු ලබන මුදල් ත්‍යාගවල එකතුව රුපියල් ලක්ෂ විසිපහකි..
තරගාවලියේ විවෘත ශූරතාව සඳහා රුපියල් 250,000ක් ද අනු ශූරතාව සඳහා රුපියල් 200,000ක්ද තෙවැනි ස්ථානය සඳහා රුපියල් 150,000ක් ද පිරිනැමේ. 4 වැනි ස්ථානයේ සිට 30 වැනි ස්ථානය දක්වාත් මුදල් ත්‍යාග පිරිනැමේ.
එමෙන්ම කාන්තා ශූරතාව සඳහා රුපියල් 100,000 ක්ද, කාන්තා අනු ශූරතාව සඳහා රුපියල් 50,000 ක් ද තෙවැනි ස්ථානය සඳහා රුපියල් 30,000ක්ද පිරිනමනු ලබන අතර මේ ආකාරයටම අනෙක් තරග ඉසව්වල ජයගාහකයින්ටද මුදල් ත්‍යග පිරිනැමේ.
මෙම තරගාවලිය සඳහා අවශ්‍ය වැඩි විස්තර තරග සංවිධයක ලක්මල් අමරසේකර මහතා (0779190000) අමතා ලබා ගත හැකිය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
