ඉන්දියාව දෙවැනි තරගයත් දිනයි

කොළඹ සුගතදාස ක්‍රීඩාංගණයෙදී පැවැත්වෙන දකුණු ආසියානු ජල ක්‍රීඩා තරගාවලියේදී ශ්‍රී ලංකාව සහ ඉන්දියාව අතර අද (19 වැනිදා) පැවැති කාන්තා වෝටර් පෝලෝ තරගය ගෝල 8-4 ක් ලෙස ජයගැනීමට ඉන්දීය ක්‍රීඩිකාවෝ සමත් වූහ.  

ආරම්භයේ සිටම දක්ෂ ලෙස තරගයට අවතීර්ණ වූ ඉන්දීය ක්‍රීඩිකාවෝ පළමු කාර්තුවේ අවසානයේ ගෝල 3-1 ක් පෙරමුණ ගැනීමට සමත් වූහ. දෙවැනි කාර්තුවේදී තරගය තරමක් උණුසුම් මුහුණවරක් ගත් අතර එහිදී දෙපිලම ගෝල 2 බැගින් ලබාගනිමින් ගෝල 5--3 ක් ලෙස තම කණ්ඩායම ඉදිරියට ගෙන ගියේය.
 
කෙසේ වෙතත් තෙවැනි කාර්තුවේදී ආක්‍රමණශීලී ක්‍රීඩා විලාශයක් පෙන්නුම් කළ ඉන්දීය ක්‍රීඩිකාවෝ එහිදී ගෝල 2 ක් ලබාගත් අතර ශ්‍රී ලංකා ක්‍රීඩිකාවන්ට තෙවැනි කාර්තුවේදී ගෝල ලබාගැනීමට නොහැකි විය.

සිව්වැනි කාර්තුවේදී දෙපිලම ගෝලය බැගින් ලබාගත් අතර නියමිත කාලය අවසන් වන විට ගෝල 8-4 ලෙස සමස්ත තරගයේ ජය තමන් සතු කරගැනීමට තරගය පුරා සිය අණසක පැතිරවූ ඉන්දීය ක්‍රීඩිකාවෝ සමත් වූහ.

ඉන්දියාව වෙනුවෙන් පූජා බූමකුමාරි, පායලී සන්ත්‍රා සහ අනුශ්‍රී දාස් ගෝල 2 බැගින් ලබාගත් අතර ද්‍රිෂ්යා කුමාරි සහ කීර්තනා චන්ද්‍රා එක් ගෝලය බැගින් ලබාගත්හ.

ශ්‍රී ලංකාව වෙනුවෙන් සෂී වීරවර්ධන, තුෂාරි ඒකනායක, ශෙනාලා ඬේවිඞ් සහ නදිෂ්කා සේනානායක ගෝලයක් බැගින් ලබාගත්හ.