සූදුකාරයන්ගේ ක්‍රීඩාවක් - සභාපති

වත්මන් එල්ලේ ක්‍රීඩාව සූදුකාරයන් අතට පත්ව තිබෙන බැවින් නාමයෝජනා නැවත ඉදිරිපත් කර සිටියත් ශ්‍රී ලංකා එල්ලේ සම්මේලනයේ සභාපතිධුරයේ කටයුතු කිරීම ගැන නැවැත සිතා බැලීමට සිදුව ඇතැයි එහි වත්මන් සභාපති හිටපු නියෝජ්‍ය ඇමැති සරත් කුමාර ගුණරත්න මහතා පවසයි.

එල්ලේ සම්මේලනයේ නිලවරණය පසුගිය මැයි 27 වැනිදා පැවැත්වීමට නියමිතව තිබුණත් විගණන වාර්තා අනුමැතිය පමාව නිසා එය මේ වනවිට දින නියමයක් නැතිව කල් දමා තිබේ. එල්ලේ සම්මේලනයේ නිලවරණය පමාව ගැන සරත් කුමාර ගුණරත්න මහතා මෙසේද පැවසීය.

“ක්‍රීඩා අමාත්‍යාංශය එක එක වෙලාවට එක එක කතා කියනවා. එල්ලේ සම්මේලනයේ පසුගිය වසර ගණනාවක් ගිණුම් වාර්තා විගණනය වෙලා නෑ. අපේ නිල කාලයේ විගණන වාර්තා අපි බාරදුන්නා. ඒකෙ අනුමැතිය පමාවට අපට වගකීමක් ගන්න බෑ’.

“එල්ලේ ක්‍රීඩාව අද සුදුකාරයන්ට ගිහිල්ලා. තැන තැන එල්ලේ තරගාවලි සමහරු ලෑස්ති කරනවා. විනිසුරුවන් තමුන්ම පත් කර ගන්නවා. ඊළඟට එතනට සූදුකාරයෝ එකතු වෙලා එතන වෙන ව්‍යාපාරයක් ගෙනියනවා. ඒ නිසා මා නාමයෝජනා බාරදුන්නත් නැවත එල්ලේ සභාපති ධුරය බාර ගන්නවාද කියලා තාමත් හිතමින් ඉන්නවා” යයිද සරත් කුමාර ගුණරත්න මහතා පැවසීය.

මේ අතර මෙවර එල්ලේ නිලවරණය කැඳවා තිබියදී ප්‍රතිපාර්ශවයකින් එල්ලේ සම්මේලනය වත්මන් පාලනයට චෝදනා ගණනාවක් එල්ලකර තිබේ.

 ඒ එල්ලේ සම්මේලනය ව්‍යවස්ථාව උල්ලංඝනය කරමින් සාමාජිකයන් 23ක් වන විධායක සභාවේ එම සාමාජිකත්වය 27ක් දක්වා ඉහළ නැංවීම, පැවැත්වීමට නියමිත නිලවරණයෙන් ක්‍රීඩා සමාජ 27ක් ඉවත්කිරීම, නවක ක්‍රීඩා සමාජ 38ක්  අනුමැතියකින් තොරව එල්ලේ සම්මේලනයට ඇතුළත් කර ගැනීම විගණන වාර්තාව සම්බන්ධයෙන් පැන නැගී තිබෙන ගැටළු ඒ අතර ප්‍රධාන වෙති. කෙසේ වුවත් මෙවර එල්ලේ නිලවරණයෙන් ක්‍රීඩා සමාජ ගණනාවක් ඉවත්කිරීමට එරෙහිව ක්‍රීඩා අමාත්‍යාංශයට යොමු කළ විරෝධතාවයක් විභාගයට ගැනීමකින් තොරව ඉවත දැමු බව වාර්තාවේ. ඊට හේතුවී ඇත්තේ විරෝධතාවය ඉදිරිපත් කළ පාර්ශවය පැමිණිලිකාර පාර්ශවය ලෙස පිළිගැනීම ක්‍රීඩා අමාත්‍යාංශය ප්‍රතික්‍ෂේප කිරීමය.

එළඹෙන එල්ලේ නිලවරණයේදි (2019-21) සභාපති ධුරයට පළාත් සභා මන්ත්‍රිවරයෙකු වන සනත් ප්‍රදීප් මහතාද,  නාමයෝජනා බාරදීමේ සෙසු තනතුරු සඳහා වත්මන් නිලධාරීන් ගණනාවක් ඇතුළුව ක්‍රීඩා සමාජ නියෝජිතයන් රැසක්ද නාමයෝජනා ඉදිරිපත් කර තිබේ.

 ක්‍රීඩා සමාජ 156ක් මෙවර නිලවරණයේදී ඡන්දය භාවිතා කිරීමට සුදුසුකම් ලබා සිටිති.