(නාමල් පතිරගේ)
කොළඹ රාජකීය විදුහල් හොකී සමාජය සංවිධානය කරන 20 වැනි අන්තර් පාසල් ඊ සූ - බ්ලූ ඇන්ඩ් ගෝල්ඩ්‘ අන්තර් පාසල් වයස 20 න් පහළ හොකී (බාලක - බාලිකා) තරග මාලාව පාසල් 70 ක කණ්ඩායම් සහභාගිත්වයෙන් සිකුරාදා (8) එම විදුහල් ප්‍රධාන ක්‍රීඩාංගණයේදී ආරම්භ වේ.එය සෙනසුරාදාත් (9) පැවැත්වේ.
මෙහි තරඟ විනිශ්චයට ජාත්‍යන්තර විනිසුරුවන්ද කැදවීම් ලබා තිබෙන අතර තරග තීරණ ලබා දීමේදී අති නවීන තාක්ෂණ ක්‍රමවේද හා වීඩියෝ දර්ශන යොදා ගන්නා බවත් තරගාවලියට සහභාගි වන සියලුම පාසල් කණ්ඩායම් සදහා නවාතැන් ඇතුළු අනෙකුත් පහසුකම්ද සූදානම් කර ඇතැයි කොළඹදී පැවැති මාධ්‍ය හමුවකදී කොළඹ රාජකීය විදුහල් හොකී සමාජයේ ලේකම් දමිත සිල්වා මහතා පැවැසීය.
කුසලාන, පළග හා බදුන යන කාණ්ඩ තුනක බාලක හා බාලිකා තරග මාලා එහිදී පැවැත්වෙන අතර ඊට තරග 200 ක් ඇතුළත් වෙයි.බාලක කණ්ඩායම් 40 ක් සහ කාන්තා කණ්ඩායම් 30 ක් තරගමාලාවට සහභාගි වීමට නියමිතය.
මෙම ශූරතාව සඳහා පැවැති මාධ්‍ය හමුවේදී රාජකීය විදුහල් හොකී සමාජයේ ලේකම් දමිත සිල්වා මහතා පැවැසුවේ 1992 දී කණ්ඩායම් 14 කින් ආරම්භ කළ මෙම තරගාවලියට මෙම වසරේදී කණ්ඩායම් 70 ක් සහභාගි කිරීමට රාජකීය හොකී ක්‍රීඩා සමාජය සමත්ව තිබෙන බවයි.රාජකීය හොකී සමාජයේ සභාපති, විදුහල්පති අතුල විජේවර්ධන,රාජකීය සත් සාමාජික හොකී තරග කමිටුවේ සභාපති පුන්සර අරවින්ද යන මහත්වරුද මාධ්‍ය හමුවේදී අදහස් දැක් වූහ.
පසුගිය වසරේ (2024) බාලක හා බාලිකා කුසලාන ශූරතා මාතලේ ශාන්ත තෝමස් හා වෙන්නප්පුව ශුද්ධ වූ පවුලේ බාලිකා යන විදුහල් විසින්ද, පළග බාලක හා බාලිකා ශූරතා මහනුවර විද්‍යාර්ථ හා කොළඹ මියුසියස් යන විදුහල් විසින්ද බදුන බාලක හා බාලිකා ශූරතා මොරටුව වේල්ස් කුමර හා මහනුවර ස්වර්ණමාලී බාලිකා යන විදුහල් විසින්ද දිනා ගන්නා ලදී.
මෙවරත් තරගාවලියට ඊසොෆ්ට් මෙට් රෝ කැම්පස් හා ඊසොෆ්ට් යුනි යන ආයතනය ප්‍රධාන අනුග්‍රහය දක්වයි.සිඇප්, මිනෙල් ලංකා පෞද්ගලික, එල්.ටී.සී.ට්‍රාන්ස්ෆෝමර් පෞද්ගලික යන ආයතන ඊට රන් අනුග්‍රහය දක්වති.
පැලවත්ත ඩයරිස්, එස්.එල්.ටී.මොබිටෙල්, ශ්‍රී ලන්කන් එයා ලයින්ස්, ස්කෑන්වෙල් පෞද්ගලික, වීක්ස් සොලුටේසන්ස්, ඇමරිකන් වෝටර් සිස්ටම් පෞද්ගලික, ඊ-එෆ්.එම්, ඩයමන්ඩ් ෆූඩ්ස්, සදාහරිත වැවිලි සමාගම හා ආර්. සහ ආර්. ෆයින්ස් ජෙම්ස් යන ආයතන මෙහි සහාය අනුග්‍රාහකයෝ ලෙස කටයුතු කරති.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
