ක්‍රිකට් සභාපති තනතුරට නාමයෝජනා 4 ක්

ශ්‍රී ලංකා ක්‍රිකට් ආයතනයේ ඉදිරි නිලවරණයේදී සභාපති ධුරය සඳහා තරග කිරීමට ජයන්ත ධර්මදාස, මොහාන් ද සිල්වා, කේ. මතිවානන් සහ ශම්මි සිල්වා යන මහත්වරු නාමයෝජනා අද (17) බාරදුන්හ.

ශ්‍රී ලංකා ක්‍රිකට් ආයතනයේ 2018 වසරේ සිට 2021 වසර දක්වා වන පාලන කාලය වෙනුවෙන් වන නිලධාරී මණ්ඩලය පත්කරගැනීමේ නිලවරණය සඳහා නාමයෝජනා බාරගැනීම අද පස්වරු 4.00 ට අවසන් විය.

මෙහිදී සභාපති ධූරයට ‘සුමතිපාල’ පාර්ශවයෙන් හිටපු සභාපතිවරයකු වන මොහාන් ද සිල්වා සහ හිටපු භාණ්ඩාගාරිකවරයකු වන ශම්මි සිල්වා යන මහත්වරු ඉදිරිපත්ව සිටිති.

‘රණතුංග’ පාර්ශවයෙන් සභාපති ධූරයට හිටපු සභාපතිවරයකු වන ජයන්ත ධර්මදාස සහ හිටපු උප සභාපතිවරයකු වන කේ. මතිවානන් යන මහත්වරු ඉදිරිපත්ව සිටිති.

උප සභාපති ධුර දෙක සඳහා හය දෙනක් ඉදිරිපත්ව සිටිති. ලෝක ශූර ශ්‍රී ලංකා පිලේ නායක අර්ජුන රණතුංග සහ ලෝක ශූර ශ්‍රී ලංකා ක්‍රිකට් පිලේ සාමාජික ප්‍රමෝද්‍ය වික්‍රමසිංහ යන මහත්වරු උප සභාපති ධුරයට නාමයෝජනා ඉදිරිපත් කිරීම කැපී පෙනේ.

ලේකම් ධූරයට හතර දෙනකු නාමයෝජනා ඉදිරිපත් කර තිබෙන අතර ‘රණතුංග’ පාර්ශවයෙන් හිටපු ලේකම්වරයකු වන නිශාන්ත රණතුංග මහතා ඉදිරිපත්ව සිටියි.

බන්දුල දිසානායක, ශම්මි සිල්වා සහ මොහාන් ද සිල්වා යන මහත්වරු ‘සුමතිපාල’ පාර්ශවයෙන් ලේකම් ධූරයට නාමයෝජනා ඉදිරිපත්කර තිබේ.

භාණ්ඩාගාරික ධූරයට ‘රණතුංග’ පාර්ශවයෙන් ඊස්මන් නාරංගොඩ සහ නලීන් වික්‍රමසිංහ යන මහත්වරු ද, ‘සුමතිපාල’ පාර්ශවයෙන් ලසන්ත වික්‍රමසිංහ, රවීන් වික්‍රමරත්න සහ ශම්මි සිල්වා යන මහත්වරු ද, නාමයෝජනා ඉදිරිපත් කර තිබේ.

මෙහිදී ‘සුමතිපාල’ පාර්ශවයෙන් ශම්මි සිල්වා මහතා තනතුරු හතරකට ද, මොහාන් ද සිල්වා මහතා තනතුරු තුනකට ද, නාමයෝජනා ඉදිරිපත්කර තිබේ.  

 මෙම නිමයෝජනාවලට එරෙහිව විරෝධතා මේ මස 31 වැනිදා දක්වා ඉදිරිපත් කළ හැකි අතර විරෝධතා සළකා බැලීම ලබන ජනවාරි මස 1 සහ 2 දෙදින පැවැත්වීමට නියමිතය.

නිලවරණය ලබන පෙබරවාරි මස 7 වැනිදා පැවැත්වීමට නියමිතය බව ක්‍රීඩා අධ්‍යක්‍ෂ ජනරාල් ධම්මික මුතුගල මහතා පැවසීය.  
හිටපු අභියාචනාධිකරණ විනිසුරු පී. ඩබ්ලිව්. ඩී. සී. ජයතිලක මහතාගේ සභාපතිත්වයෙන් යුත් ශ්‍රී ලංකා ක්‍රිකට් නිලවරණය කමිටුව මෙම නාමයෝජනා බාරගත්තේය.