චීන තායිපේ පිල ශ්‍රී ලංකාව පරදවයි

චීන තායිපේහිදී පැවැත්වෙන ආසියානු බේස්බෝල් ශූරතාවලියේ ඊයේ (4 වැනිදා) පැවැති තරගයකදී ශ්‍රී ලංකාවට එරෙහිව ලකුණු 13-0 ක ජයක් අත්කර ගැනීමට සත්කාරක චීන තායිපේ කණ්ඩායම සමත් විය. 

එම තරගය ඉනිම් 6 කට සීමා වූ අතර තෙවැනි ඉනිම අවසානයේ ලකුණු 1-0 ක් ලෙස ඉදිරියෙන් සිටි චීන තායිපේ ක්‍රීඩකයෝ සිවුවැනි ඉනිමේදී තවත් ලකුණු 7 ක් ලබාගනිමින් ලකුණු පරතරය වැඩි කරගත්හ.

එහෙත් තරගය පුරාම ප්‍රබල චීන තායිපේ කණ්ඩායම හමුවේ එක් ලකුණක් හෝ රැස්කිරීමට ශ්‍රී ලංකා ක්‍රීඩකයෝ අසමත් වූහ. 

මින් පෙර පැවැති තරගවලදී කොරියාව හමුවේ ලකුණු 18-0 ක් ලෙසද, පිලිපීනය හමුවේ ලකුණු 8-5 ක් ලෙසද ශ්‍රී ලංකා කණ්ඩායම පරාජයට පත්විය. ඒ අනුව ‘ඒ’ කාණ්ඩය යටතේ තරගාවලියට සහභාගි වූ ශ්‍රී ලංකා කණ්ඩායමට මූලික වටයේදී සහභාගි වූ තරග 3 දීම පරාජයන්ට මුහුණදීමට සිදුවිය.