(දමින්ද විජේසූරිය)
ශ්‍රී ලංකාවේ දේශීය සහ යොවුන් ක්‍රිකට් තරගාවලි සඳහා විකාශන සහ ඉසව් අයිතිවාසිකම් සම්බන්ධයෙන් ශ්‍රී ලංකා ක්‍රිකට් ආයතනය ‘තින්ක් කියුබ් සිස්ටම්ස් (පුද්ගලික) සමාගම සමගින් ගිවිසුම් අත්සන් කර තිබේ. ‘තින්ක් කියුබ් සිස්ටම්ස් (පුද්ගලික) සමාගම සහ කන්ටෙන්ට් ‘අයි’ ඒෂියා (පුද්ගලික) සමාගම එකිනෙකා සමගින් ගිවිසුම්ගත වූ හවුල්කාර සමාගම් දෙකකි. කෙසේ වෙතත් මම ගිවිසුමේදී ‘තින්ක් කියුබ් සිස්ටම්ස් (පුද්ගලික) සමාගම වැඩි වගකීමක් බාරගනු ඇත.
ඒ අනුව ශ්‍රී ලංකාවේදී පැවැත්වෙන ශ්‍රී ලංකා යොවුන්, ශ්‍රී ලංකා නැගී එන කණ්ඩායම් සහ ශ්‍රී ලංකා ‘ඒ’ කණ්ඩායම් සහභාගි වන අන්තර්ජාතික තරග මෙන්ම ශ්‍රී ලංකාවේදී පැවැත්වෙන සියලුම දේශීය තරග විකාශය කිරීමේ අයිතිවාසිකම ද ‘තින්ක් කියුබ් සිස්ටම්ස් (පුද්ගලික) සමාගම විසින් හිමිකරගනු ලැබ ඇත. ඊට අමතරව ශ්‍රී ලංකාවේදී පැවැත්වෙන කාන්තා ‘ඒ’ තරගාවලි සහ කාන්තා 19 න් පහළ තරගාවලි සඳහාත් විකාශන අයිතිය ‘තින්ක් කියුබ් සිස්ටම්ස් (පුද්ගලික) සහ කන්ටෙන්ට් ‘අයි’ ඒෂියා (පුද්ගලික) සමාගම් විසින් අත්පත් කරගනු ලැබ තිබේ.
මේ වසරේ අප්‍රේල් මස 24 වැනිදා සිට ක්‍රියාත්මක වන මෙම ගිවිසුමට අනුව මේ වන විටත් තරගාවලි කිහිපයකම විකාශන කටයුතු කෙරී ඇතත් ශ්‍රී ලංකා ක්‍රිකට් ආයතනය විසින් එය නිල වශයෙන් නිවේදනය කරන ලද්දේ ජූලි 30 වැනිදාය.
අන්තර් ක්‍රීඩා සමාජ විස්සයි-20 තරගාවලිය, අන්තර් ක්‍රීඩා සමාජ එක්දින තරගාවලිය, ‘බී’ තලයේ කණ්ඩායම් අතර විස්සයි-20 සහ එක්දින තරගාවලිය මෙන්ම ශ්‍රී ලංකා 19 න් පහළ යොවුන් (බාලිකා) තරගාවලිය මෙම ගිවිසුම යටතේ මේ වනවිටත් විකාශය කෙරී ඇති තරගාවලි වේ.
ශ්‍රී ලංකාවේදී පැවැත්වෙන ශ්‍රී ලංකා යොවුන්, ශ්‍රී ලංකා නැගී එන කණ්ඩායම් සහ ශ්‍රී ලංකා ‘ඒ’ කණ්ඩායම් සහභාගි වන අන්තර්ජාතික තරග මෙන්ම ශ්‍රී ලංකාවේදී පැවැත්වෙන සියලුම දේශීය තරගද ‘ටැලන්ට් ටීවී’ ඔස්සේ සජීවී ලෙසින් විකාශය කෙරෙනු ඇත. ‘ටැලන්ට් ටීවී’ යනු මුදල් ගෙවීමකින් තොරව නැරඹිය හැකි, දිවයින පුරා ක්‍රියාත්මක වන රූපවාහිනී සේවාවකි. ඊට අමතරව ශ්‍රී ලංකා ක්‍රිකට් යූ-ටියුබ් නාළිකාව ඔස්සේ ද මෙම තරග විකාශය කෙරේ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
