ශ්‍රී ලංකා - ස්කොට්ලන්ත තරගය වැස්සට සේදෙයි

ශ්‍රී ලංකාව සහ ස්කොට්ලන්තය අතර ස්කොට්ලන්තයේ ඊයේ (18 වැනිදා) පැවැත්වීමට නියමිතව තිබූ පළමු එක්දින තරගය වර්ෂාව නිසා අතහැර දමන ලදි. ස්කොට්ලන්තයේ එඩින්බරෝ නුවරදී පැවැත්වීමට නියමිතව තිබූ මෙම තරගයේ එකම පන්දුවක් හෝ යැවිය නොහැකි විය. 

දිගින් දිගටම පවැති වර්ෂාව හේතුවෙන් කණ්ඩායම් දෙකම තමන් නවාතැන් ගෙන සිටි හෝටලයට වී සිටියද තරමක් දහවල් වී ශ්‍රී ලංකා කණ්ඩායම ක්‍රීඩාංගණයට පැමිණියේය. පස්වරු 12.45 ට පමණ නැවත වරක් වර්ෂාව ඇද හැළුණු අතර වර්ෂාව නතර වන තෙක් පැය 5 ක ආසන්න කාලයක් බලා සිටීමෙන් පසුව තරගය අතහැර දැමීමට විනිසුරුවරු තීරණය කළහ. 

මෙම තරගය නැරඹීම සඳහා 15,000 කට ආසන්න පිරිසක් ප්‍රවේශපත්  මිලදීගෙන තිබූ නමුත් තරගය වර්ෂාවට සේදීයාම නිසා එම ප්‍රවේශපත් වල මිල ආපසු ගෙවීමට හෝ අඟහරුවාදා පැවැත්වෙන තරගයේදී ඔවුන්ට නොමිලයේ ප්‍රවේශපත් නිකුත් කිරීමට ස්කොට්ලන්ත ක්‍රිකට් සංගමයට සිදුව තිබේ. 

ඡායාරූප - ස්කොට්ලන්ත ක්‍රිකට් සංගමය අනුග්‍රහයෙනි