බාලිකා ශූරතාව රත්ගම දේවපතිරාජයට

නුගේගොඩ අනුලා විද්‍යාලය සහ රත්ගම දේවපතිරාජ විද්‍යාලය අතර පැවැති වයස 19 න් පහළ බාලිකා සීමිත ඕවර ක්‍රිකට් තරගාවලියේ අවසන් මහ තරගයේ ජය හිමිකර ගත් රත්ගම දේවපතිරාජ විද්‍යාලය ශූරතාවය දිනා ගැනීමට ඊයේ (31 වැනිදා) සමත්විය.

 වත්තල ලයිසියම් ජාත්‍යන්තර විද්‍යාලයීය ක්‍රීඩාංගණයේදී පැවැති අවසන් මහ තරගයේදී ලකුණු 85 ක ජයක් හිමිකර ගැනීමට රත්ගම දේවපතිරාජ විද්‍යාලීය බාලිකාවෝ සමත්වූහ.

කාසියේ වාසිය දිනාගත් රත්ගම දේවපතිරාජ විද්‍යාලයේ නායිකාව පළමුව පන්දුවට පහරදීමට තීරණය කළ අතර ඕවර 30 අවසානයේ කඩුලු 9 ක් දැවී ලකුණු 189 ක් රැස්කිරීමට ඔවුන් සමත්වූහ.

සත්‍යා සංදීපනි (65) අර්ධ ශතකයක් ලබාගනිමින් රත්ගම දේවපතිරාජ විද්‍යාලයීය ලකුණු පුවරුව ඉහළ දැමීමට සමත්වූ අතර හර්ෂිතා මාධවී කඩුලු 3 ක් ද සිත්මී කෞමදී සහ තරිණි හිරන්‍යා කඩුලු 2 බැගින්ද දවාගනිමින් නුගේගොඩ අනුලා විද්‍යාලය වෙනුවෙන් පන්දුවෙන් දස්කම් දැක්වූහ.

ජයග්‍රහණය සදහා ලකුණු 190 ක ඉලක්කයක් හඹාගිය නුගේගොඩ අනුලා විද්‍යාලයට ඕවර 30 අවසානයේ කඩුලු 7 ක් දැවී රැස්කිරීමට හැකිවූයේ ලකුණු 104 ක් පමණි.

ලකුණු 43 ක් ලබාගත් හර්ෂිතා මාධවී අනුලා විද්‍යාලය වෙනුවෙන් වැඩිම ලකුණු රැස්කළ පිතිකාරිණියවූ අතර ටිලීෂියා චතුරංගනී සහ සචිනි නිසංසලා කඩුලු 2 බැගින් දවාගනිමින් දේවපතිරාජ විද්‍යාලය වෙනුවෙන් පන්දුවෙන් දස්කම් දැක්වූහ.

දේවපතිරාජ විද්‍යාලය - ඕවර 30 කදී කඩුලු 9 ක් දැවී ලකුණු 189
(සත්‍යා සංදීපනි 65, උමාෂ් තිමේෂානී 35, ශිකාරී නුවන්තා 29, හර්ෂිතා මාධවී 30/3, සිත්මී කෞමදී 35/2, තරිණි හිරන්‍යා 44/2)

අනුලා විද්‍යාලය - ඕවර 30 කදී කඩුලු 7 ක් දැවී ලකුණු 104
(හර්ෂිතා මාධවී 43, සිත්මී කෞමදී 29, ටිලීෂියා චතුරංගනී 09/2, සචිනි නිසංසලා 19/2)