ශා.ජෝසප් විද්‍යාලය පෙර අ.අ. පූර්ව වටයට

අන්තර් පාසල් වයස 19 න් පහළ ‘සිංගර් කුසලාන’ එක්දින ක්‍රිකට් තරගාවලියේ පළමු කොටසේ පෙර අර්ධ අවසන් පූර්ව වටය සඳහා සුදුසුකම් ලබාගැනීමට කොළඹ ශාන්ත ජෝසප් විද්‍යාලය අද (5 වැනිදා) සමත්විය.

කොළඹ ශාන්ත ජෝසප් විද්‍යාලීය ක්‍රීඩාංගණයේදී පැවැති පෙර අර්ධ අවසන් පූර්ව වටය සඳහා සුදුසුකම් ලබාගැනීමේ තරගයකදී වෙන්නප්පුව ශාන්ත ජෝසප් වාස් විද්‍යාලයට එරෙහිව කඩුලු 5 ක ජයක් හිමිකර ගැනීමට කොළඹ ශාන්ත ජෝසප් විද්‍යාලය සමත්විය.

කාසියේ වාසිය දිනූ ශාන්ත ජෝසප් විද්‍යාලය පළමුව පන්දුවට පහරදීම සඳහා ශාන්ත ජෝසප් වාස් විද්‍යාලයට ආරාධනා කළ අතර ඕවර 49.1 කදී සියලුදෙනා දැවී ඔවුන්ට රැස්කිරීමට හැකිවූයේ ලකුණු 180 ක් පමණි.

නිපුන් ධනංජය (74) අර්ධ ශතකයක් ලබාගනිමින් පිත්තෙන් දස්කම් දැක්වුවද සෙසු පිතිකරුවෝ අසාර්ථක වීම හේතුවෙන් ඉහළ ලකුණු සංඛ්‍යාවක් කරා යෑමට ඔවුන්ට නොහැකි වූහ. ලක්ෂාන් ගමගේ, අෂීන් ඩැනියල් සහ අශාන් ද අල්විස් කඩුලු 2 බැගින් දවාගනිමින් ශාන්ත ජෝසප් වාස් විද්‍යාලය අඩු ලකුණු සංඛ්‍යාවකට සීමාකිරීමට සමත්වූහ.

ජයග්‍රහණය සඳහා ලකුණු 181 ක ඉලක්කයක් හඹාගිය ශාන්ත ජෝසප් විද්‍යාලය ඕවර 37.1 කදී කඩුලු 5 ක් දැවී ඉලක්කය පහසුවෙන් ජයගැනීමට සමත්විය.

දුනිත් වෙල්ලාලගේ (නොදැවී 64) සහ දිලේෂ් පෙරේරා (64) අර්ධ ශතක රැස්කරමින් ශාන්ත ජෝසප් විද්‍යාලය ජයග්‍රහණය කරා රැගෙන යාමට සමත්වූහ.

ශා.ජෝසප් වාස් විද්‍යාලය - ඕවර 49.1 කදී සියලුදෙනා දැවී ලකුණු 180
(නිපුන් ධනංජය 74, යොහාන් මධුවන්ත නොදැවී 27, ලක්ෂාන් ගමගේ 21/2, අෂීන් ඩැනියල් 31/2, අශාන් ද අල්විස් 41/2)

ශා.ජෝසප් විද්‍යාලය - ඕවර 37.1 කඩුලු 5 ක් දැවී ලකුණු 182
(දුනිත් වෙල්ලාලගේ නොදැවී 64, දිලේෂ් පෙරේරා 64)