(නාමල් පතිරගේ)
අගෝස්තු 18 වැනිදාට පැවැත්වීමට නියමිත ශ්‍රී ලංකා මලල ක්‍රීඩා ආයතනයේ නිලවරණය (2025 - 27) ප්‍රකාශයට පත්වීමත් සමග එම ආයතනය විසින් වත්මන් ක්‍රීඩා ඇමැති සුනිල් කුමාර ගමගේ මහතා මෑතදී නිකුත් කළ ක්‍රීඩා සංගම් රෙගුලාසී මාලාවේ වගන්ති කීපයක් පැහැදිලි කරන ලෙස ඉල්ලා ක්‍රීඩා අමාත්‍යාංශයට ලිපියක් යොමු කර තිබේ.
වත්මන් ක්‍රීඩා ඇමැති සුනිල් කුමාර ගමගේ මහතා අති විශේෂ ගැසට් නිවේදනයක් මගින් නිකුත් කළ 2025 අංක 01දරන ජාතික ක්‍රීඩා සංගම් නියෝග මාලාව යටතේ මෙම කරුණු පැහැදිලි කිරීම දක්වන ලෙස ඉල්ලා ක්‍රීඩා අමාත්‍යාංශයේ ලේකම්වරයාට ශ්‍රී ලංකා මලල ක්‍රීඩා ආයතනයේ ලේකම් සමන් කුමාර ගුණවර්ධන මහතා විසින් යොමු කරනු ලැබ ඇතැයි වාර්තාවේ.
කෙසේවූවත් එය යොමු කර මාසයකට ආසන්න කාලයක් ගතවූවත් ක්‍රීඩා අමාත්‍යාංශය ඊයේ ( 24) වන තෙක් ශ්‍රී ලංකා මලල ක්‍රීඩා ආයතනයට පිළිතුරක් ලබාදී නැතැයිද වාර්තාවේ.
ඒ වෙනුවට ක්‍රීඩා අමාත්‍යාංශයේ ලේකම්වරයා ඒ සම්බන්ධයෙන් ක්‍රීඩා අධ්‍යක්ෂ ජනරාල්වරයාගෙන් කරුණු විමසීමක් පමණක් මෙතෙක් සිදු කර ඇතැයිද වාර්තාවේ.
එකී නව රෙගුලාසී මාලාවට අනුව ජාතික ක්‍රීඩා සංගමයක නිලවරණයට නාමයෝජනා ඉදිරිපත් කිරීමට පෙර වසර දෙකක කාල සීමාවක් තුළදී එහි වෘත්තීය පුහුණුකරුවකු, තාක්ෂණ නිලධාරියෙකු හෝ විනිසුරුවකු ලෙස කටයුතු කර ඇති අයට එහිදී තනතුරු සදහා ඉදිරිපත් වීම වළක්වා ඇත.
එහිදී මලල ක්‍රීඩා ආයතනය ක්‍රීඩා අමාත්‍යාංශයෙන් ඉල්ලා ඇත්තේ එම තනතුරුවල වෘත්තීය තත්වය නිර්වචනය කරන ලෙසයි. මලල ක්‍රීඩා ආයතනයට සිය පුහුණුකරුවන්, විනිසුරුවන් හා තාක්ෂණික නිලධාරීන් සම්බන්ධයෙන් විශාල වගකීමක් ඇති බැවින් නිලවරණය වළක්වාලමින් ඔවුන්ට නිකුත් කර තිබෙන ක්‍රීඩා රෙගුලාසීවල නීතිමය තත්වය පැහැදිලි කර ගැනීමට අපොහොසත් වන්නේ නම් එය බරපතල ගැටළුවක් විය හැකි යයි එහිදී මලල ක්‍රීඩා ආයතනය සිය ලිපියෙන් අවධාරණය කර තිබේ.
ශ්‍රී ලංකා මලල ක්‍රීඩා ක්ෂේත්‍රයේ මේ වන විට පුහුණුකරුවන්, විනිසුරුවන් හා තාක්ෂණික නිලධාරීන් 2000 කට වැඩි පිරිසක් සේවය කරන බව වාර්තාවේ. ඉන් වැඩි පිරිස විනිසුරුවෝ වෙති. ක්‍රීඩා අමාත්‍යාංශය සිය තනතුරු විභාග වලදී මෙන්ම තනතුරු උසස්වීම් වලදීත් ක්‍රීඩා විනිසුරු, පුහුණුකරු තනතුරු සලකා බැලෙන බැවින්ද ඉහත ක්‍රීඩා රෙගුලාසී වාරණය ඔවුන්ගේ දැඩි අවධානයට යොමුවී තිබේ.
මේ අතර නව ක්‍රීඩා රෙගුලාසි මාලාවේ අපැහැදිලි යයි හැගෙන තවත් වගන්ති කීපයක් පිළිබදවද ශ්‍රී ලංකා මලල ක්‍රීඩා සංගමය ක්‍රීඩා අමාත්‍යාංශයෙන් විමසීම් කර තිබේ.නව ක්‍රීඩා රෙගුලාසි වලට යටත් වන ජාතික ක්‍රීඩා සංගම්හි නිල කාලයන් හා ධූර කාලයන් පිළිබඳවද පැහැදිලි කර ගත යුතු බවද මලල ක්‍රීඩා ආයතනය ක්‍රීඩා අමාත්‍යාංශයට සිය ලිපියෙන් අවධාරණය කර තිබේ.
විශේෂයෙන්ම පුහුණුකරුවන්ගේ වෘත්තීය මට්ටම සළකා බැලීමට ඔවුන් ලබන දීමනා හා ගෙවීම් පිළිබඳව අවධානය යොමු කිරීම ප්‍රායෝගික නොවන බව ප්‍රකාශවී තිබේ.ඒ අනුව එය ඔවුන්ගේ වෘත්තීය මට්ටම සළකා බැලෙන නිර්නායකයක් හැටියට යොදා ගත නොහැකි බවට එහිදී තර්කයක් ගොඩ නැගී තිබෙන බැවින්ද එම ගැටළුව වඩාත් ව්‍යාකූල තත්වයකට පත්ව තිබෙන බව මලල ක්‍රීඩා ආයතනයේ මතයවී තිබේ.
කෙසේවූවත් අගෝස්තු 18 වැනිදා පැවැත්වීමට නියමිත ශ්‍රී ලංකා මලල ක්‍රීඩා ආයතනයේ එළඹෙන නිලවරණයට නාමයෝජනා බාර ගැනීම දැන් ආරම්භවී තිබේ. නාමයෝජනා බාර ගැනීම ලබන අඟහරුවාදා (29) අවසන් කෙරේ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
