මැතිව්ගේ පදක්කම් බලාපොරොත්තු බොඳවී යයි

ඉන්දුනීසියාවේ ජකාර්තා නුවරදී පැවැත්වෙන ආසියානු ක්‍රීඩා උළෙලේ අද (23 වැනිදා) පැවැති මීටර් 100 පිරිමි නිදහස් ආර පිහිනුම් ඉසව්වේ අවසන් තරගයට සහභාගීවූ මැතිව් අබේසිංහ 6 වැනියා ලෙස තත්පර 49:28 කදී තරගය නිම කළේය.

මූලික වටයේ 5 වැනි තරගයට සහභාගීවූ මැතිව් අබේසිංහ තත්පර 49:48 කදී තරගය නිමකරමින් එහි තෙවැනි ස්ථානය ලබාගත්තේ ආසියානු ක්‍රීඩා උළෙලක පිහිනුම් ඉසව්වෙන් අවසන් තරගයට තේරුණු පළමු ශ්‍රී ලාංකික ක්‍රීඩකයා ලෙසිනි. සමස්ථ කාල ගණනයේදී 4 වැනි ස්ථානය මැතිව්ට හිමිවිය.

එම ඉසව්වේම මූලික වටයේ 4 වැනි තරගයට සහභාගීවූ මැතිව් අබේසිංහගේ සොයුරු කයිල් අබේසිංහ තත්පර 50:14 කදී තරගය අවසන් කළද සමස්ථ කාල ගණනයේදී ඔහුට හිමිවූයේ 13 වැනි ස්ථානයයි.

මීටර් 50 පිරිමි නිදහස් ආර පිහිනුම් ඉසව්වේ තෙවැනි මූලික වටයෙන් තරග වැදුණු දිමුත් පිරීස් තත්පර 25:20 කදී දෙවැනියා ලෙසද සිවුවැනි මූලික වටයෙන් තරග වැදුණු චෙරන්ත ද සිල්වා තත්පර 26ථ36 කදී අටවැනියා ලෙසද තරගය නිම කිරීමට සමත්වූහ.

සමස්ථ කාල ගණනයට අනුව දිමුත් පිරීස් 25 වැනි ස්ථානයටත් චෙරන්ත ද සිල්වා 26 වැනි ස්ථානයටත් පත්වූහ.

මීටර් 200 පිරිමි නිදහස් ආර පිහිනුම් ඉසව්වේ දෙවැනි මූලික වටයෙන් තරග වැදුණු හරේන් නුගවෙල මිනිත්තු 1:56:01 කදී තරගය නිමකරමින් එහි පළමු ස්ථානය ලබාගත් අතර තෙවැනි මූලික වටයෙන් තරග වැදුණු මැතිව් අබේසිංහ මිනිත්තු 1:50:97 කදී තරගය නිම කළද ඔහුට හිමිවූයේ හයවැනි ස්ථානයයි.

සමස්ථ කාල ගණනයට අනුව මැතිව් අබේසිංහ 12 වැනි ස්ථානයටත් හරේන් නුගවෙල 26 වැනි ස්ථානයටත් පත්වූහ.