ළාබාලතම ජාතික ශූරයා දොළුවීර

කොළඹ රාජකීය විද්‍යාලයේ  මිනුල්  දොලුවීර  2017 වසරේ ජාතික  චෙස් ශූරයා  ලෙසද  අම්බලන්ගොඩ  ධර්මාශෝක විද්‍යාලයේ  සයුනි ගිහන්සා ජයවීර ජාතික චෙස් ශූරිය ලෙසද සම්මාන දිනාගත්හ.

කොළඹ රාජකීය  විද්‍යාලයේ  පැවති  ජාතික  චෙස්   ශූරතාවලියේදී  මිනුල්  දොළුවීර  විවෘත පිරිමි  අංශයේ  ශූරතාව දිනාගත්තේය. සයුනි ගිහන්සා  ජයවීර  විවෘත කාන්තා  අංශයේ  ශූරතාව  දිනාගත්තාය.

ලංකාවේ  තෝරාගත්  දක්ෂතම  චෙස්  ක්‍රීඩකයින්  14 දෙනා  අතර  සහ දක්ෂතම  චෙස්  ක්‍රීඩිකාවන්  14 දෙනා  අතර  මෙම තරගාවලිය  පැවැත්විණ.

පිරිමි  තරගාවලිය පුරාම ඉදිරියෙන්ම සිටි  මිනුල්  දොළුවිර  තරගවට  13 න් තරගවට  6ක්  පමණ  නිමවන විටදී  මේ වසරේ  තමා ජාතික චෙස් ශූරයා ලෙසට ඉඟි කළේ කොළඹ  රාජකීය විද්‍යාලයෙන්  බිහිවන තෙවන  ජාතික  චෙස් ශූරයා  වෙමිනි. ගිය වසරේ (2016) පැවති  අධ්‍යාපන පොදු  සහතික  පත්‍ර සාමාන්‍ය පෙළ  විභාගයේදී ‘ඒ ’ සාමාර්ථ  9 ක් ලබාගන්මින් ඉගෙනීමට දස්කම් දක්වන දොළුවිර තරගාවලිය  නිමාවනවිටදී  තරගාවලියේ  අනුශූරයාවූ කොළඹ  විශ්වවිද්‍යාලයේ උදිත්  ජයසුන්දරට  වඩා ලකුණු  1.5 ක  පරතරයක්  තබාගනිමින්  පිරිමි  තරගාවලියේ ශූරතාව දිනාගත්තේ මෙතෙක් බිහිවූ ලාබාලතම ජාතික  චෙස්  ශූරයා  ලෙස  අභිෂේක  ලබමිනි.

මේ තරගාවලිය  පුරාම  ඉදිරියෙන්  සිටි දොළුවීරට  හදිසි අකරතැබ්බයකට මුහුණදීමටද  සිදුවිය. ඒ  තමා  අපේක්ෂා නොකළ අවස්ථාවක තමාගේ ජයට අභියෝගයක්  නොවුනද   සංදීප් දසනායකට  පමණක්  පරාජය වීමය. තරග වට 13 න්  ලකුණු  9.5 ක්  ලබාගත්  දොලුවීරට තරගාවලියේ  ශුරතාව  හිමිවෙද්දී ඔහුට  වඩා  ලකුණු  1.5 ක්  පිටුපසින් සිටි තරග වට 13න් ලකුණු  8 ක්  ලබාගත්  උදිත්  ජයසුන්දරට  තරගාවලියේ  අනුශූරතාව හිමිවිය.

තරග වට 13න්  ලකණු 7.5 බැගින්  ලබාගත්  අම්බලන්ගොඩ  ධර්මාශෝක  විද්‍යාලයේ  එම්.සසිත්  නිපුන්  පියුමන්ත, ප්‍රසන්න කුලසුරිය, කුරුණෑගල මලියදේව විද්‍යාලයේ හර්ෂණ  තිලකරත්න, ඉසුරු  අලහකෝන්  යන ක්‍රීඩකයන් සිව්දෙනා  සම තෙවැනි  ස්ථානයට  පත්වුවද  චෙස්  ක්‍රීඩාවේ අවසාන ගණනයට අනුව එම් .සසිත් නිපුන්  පියුමන්තට තෙවැනි  ස්ථානයත්, ප්‍රසන්න කුලසුරියට සිව් වැනි ස්ථානයත්, හර්ෂණ තිලකරත්නට  පස් වැනි ස්ථානයත්  ඉසුරු  අලහකෝන්ට  හය වැනි ස්ථානයත්  හිමිවිය.

කාන්තා තරගය  අතිශය තියුණු මුහුණුවරක් ගත්තේය. ඒ මෙවර  ජාතික  ශූරිය වූ අම්බලන්ගොඩ  ධර්මාශෝක විද්‍යාලයේ සයුනි  ගිහන්සා  ජයවීර හා මීට  පෙර  පිටපිටම  දෙවරක්ම  ජාතික ශූරියවූ  කොළඹ විශාඛා  විද්‍යාලයේ  දසුනි  හංසිකා  මෙන්ඩිස්  තමන්  මුහුණදුන්  තරගවට  13 න් ලකුණු 10 බැගින්  ලබාගෙන  සමශූරියෝ වුහ.  එහෙත්  සයුනි ගිහන්සා ජයවීර විසින්  එක් තරග වටයකදී  දසුනි හංසිකා  මෙන්ඩිස්  පරාජය  කිරීම  හේතුවෙන් ඔවුන් දෙදෙනා සම ලකුණු ලැබුවද  සයුනිට ශූරතාවත් දසුනිට  අනුශූරතාවත්  හිමිවුහ.

කාන්තා තරගාවලියේදී අවසන් තරගවටය වන 13 න් වන  තරගවටයට පෙර 12 වන තරගවටය අවසානයේදී  දසුනි හංසිකා  මෙන්ඩිස්   ලකුණු  9.5 ක්  ලබාගෙන  මෙවර  ජාතික  ශූරියවූ  සයුනි  ගිහන්සා ජයවීරට  වඩා  ලකුණු  භාගයක්  ඉදිරියෙන් සිටියාය. ඒ වන විට සයුනි ගිහන්සා ජයවීර ලබා සිටියේ  9ක් පමණි. එහෙත්  අවසන්  තරග  වටයේදී ඇය තරගය ජයගෙන තම ලකුණුවලට තවත්  එක් ලකුණක්  එක්කර ගනිමින්  මුළු ලකුණු  ප්‍රමාණය ලකුණු 10 දක්වා වැඩි  කරගත්තාය.

12 වැනි  තරගවටයේදී වැඩිපුර ලකුණු  භාගයක්  අතැතිව තෙවැනි වරටත්  ජාතික  ශූරියවීමේ  සිහිනය  අභියස සිටි දසුනි හංසිකා මෙන්ඩිස් අවසන් තරග වටය ජයපරාජයෙන් තොරව අවාසනාවන්ත ලෙස නිමකළේ තම ලකුණුවලට  ලකුණු  භාගයක්  පමණක්  එක් කරගනිමිනි. එවිට  ඇයගේ ලකුණු 10 සයුනිගේ  ලකුණු වලට  සමාන විය.

තරගාවලියේදී  තරග වට  13න්  ලකුණු  9ක්  ලබාගත්  කොළඹ විශාකා  විද්‍යාලයේ ජී.පි.වයි. විජේසුරිය තෙවැනි ස්ථානය දීනාගත්තාය. තරගවට  13න්  ලකුණු 8.5ක්  ලබාගත්  කොළඹ විශාකා විද්‍යාලයේම  නික්ලේශා  තරුෂි  සිව් වැනි ස්ථානයත්  තරගවට  13න්  ලකුණු  8ක්  ලබාගත්  එම  විද්‍යාලයේම ටියුමි යශෝරාට  පස්  වැනි  ස්ථානයත්  හිමිකර ගත්තාය.