(නාමල් පතිරගේ)
ජිබොල්ටාවේදී ලබන සැප්තැම්බර් 19 වැනිදා ආරම්භ වන නව වැනි ලෝක යොවුන් දැල්පන්දු (නෙට්බෝල්) තරගාවලිය සදහා ශ්‍රී ලංකාවේ සහභාගිත්වය මේ වන විට අවිනිශ්චිත තත්වයකට පත්ව තිබෙන බව ක්‍රීඩා අමාත්‍යාංශ ආරංචි මාර්ග සදහන් කරයි.
එම තරගාවලිය නිර්දේශ ලත් රටවල් 20 කගේ සහභාගිත්වයෙන් ලබන සැප්තැම්බර් 28 වැනිදා දක්වා පැවැත්වේ.ඒ සදහා ආසියානු කලාපයෙන් ශ්‍රී ලංකාව,මැලේසියාව හා සිංගප්පූරුව නිර්දේශ ලබා සිටිති.
දකුණු කොරියාවේදී නොබෝදා නිමාවට පත්වූ 13 වැනි ආසියානු යොවුන් දැල්පන්දු තරගාවලියේදී එම රටවල් තුන පිළිවෙළින් තෙවැනි ස්ථානය, අනුශූරතාව හා ශූරතාව හිමි කර ගත්තේය.
කෙසේවූවත් එම තරග ප්‍රතිඵලයත් සමග එළඹෙන ජිබොල්ටා ලෝක යොවුන් තරග සංචාරයට ශ්‍රී ලංකාවේ සහභාගිත්වය සම්බන්ධයෙන් ක්‍රීඩා අමාත්‍යාංශය නැවැත සලකා බලමින් සිටින බවද වාර්තාවේ.
එහෙත් මේ වන විටත් ජිබොල්ටා ලෝක තරග සංචාරය ඉලක්ක කරමින් ශ්‍රී ලංකා කණ්ඩායම වෙනුවෙන් එරට හෝටලයක් නවාතැන් සදහා වෙන් කර ගැනීමට කටයුතු කර ඇතැයිද වාර්තාවේ.එහිදී හෝටලය වෙන් කරවා ගනිමින් අත්තිකාරම් මුදල් ගෙවීමට කටයුතු කර තිබේ.
කෙසේවූවත් කොරියාවේදී පැවැති ආසියානු යොවුන් දැල්පන්දු තරග සංචාරයේදී ශ්‍රී ලංකා කණ්ඩායමේ ප්‍රධාන පුහුණුකාරීණිය ලෙස කටයුතු කළ හයිසින්ත් විජේසිංහ මහත්මිය ජිබොල්ටා ලෝක කුසලාන යොවුන් දැල්පන්දු තරග සංචාරයට ශ්‍රී ලංකාව සහභාගි කිරීම සම්බන්ධයෙන් සිය අදහස් දක්වමින් ක්‍රීඩා අමාත්‍ය සුනිල් කුමාර ගමගේ මහතාට ලිපියක් යොමු කර තිබේ.
එහිදී ඇය ලිපියෙන් අවධාරණය කර ඇත්තේ විශාල වියදමක් දැරෙන ජිබොල්ටා ලෝක කුසලාන තරග සංචාරයට ශ්‍රී ලංකා කණ්ඩායම සහභාගි කිරීම සම්බන්ධයෙන් නැවැත සලකා බැලීම යෝග්‍ය බවයි.ආසියානු යොවුන් තරගාවලියේදී ශ්‍රී ලංකාව අත් කර ගත් ප්‍රතිපලය සැලකීමේදී ජිබොල්ටා ලෝක කුසලාන තරග සංචාරය සදහා ශ්‍රී ලංකා කණ්ඩායම සුදුසු මට්ටමක නොමැති බව සිය මතය බවත් එය බොහෝවිට රටට බරක් වන විශාල වියදමක් පමණක් විය හැකි බවත් ඇය එහිදී පෙන්වාදී තිබේ.
ක්‍රීඩා ඇමැතිවරයාට යොමු කළ එම ලිපියට අනුව ඇය තව දුරටත් ලිපියෙන් පෙන්වා දී ඇත්තේ තත්වය එසේ විය හැකිවූවත් ශ්‍රී ලංකාව ඊට සහභාගි නොවීමෙන් පැන නැගිය හැකි ගැටලු සම්බන්ධයෙන්ද අවධානය යොමු කළ යුතු බවයි.
ශ්‍රී ලංකාව සහභාගි නොවීමෙන් ඒ අවස්ථාව හොංකොං උදා කර ගැනීමෙන් ශ්‍රී ලංකාවට යම් අවාසියක් එතනදී උද්ගත විය හැකි බවත් එසේ ශ්‍රී ලංකාව තරගාවලියට සහභාගි නොවීමෙන් දඩයකට යටත් වන බවද හයිසින්ත් විජේසිංහ මහත්මිය පෙන්වා දේ.ඒ අතරම ශ්‍රී ලංකාවේ ලෝක කුසලාන තරග සංචාරයේ ප්‍රධාන අරමුණ වන්නේ කණ්ඩායමේ ක්‍රීඩිකාවන්ට අත්දැකීම් ලබා ගැනීම වූවත් එයින්ද සැලකිය හැකි ප්‍රතිඵලයක් නොලැබීමට ඉඩ ඇත.
ආසියානු යොවුන් තරග සංචාරයට සහභාගි වූ ශ්‍රී ලංකා කණ්ඩායමේ ක්‍රීඩිකාවන් ගෙන් කොටසක් සුදුසු මට්ටමක පසු නොවන බවට පෙනී ගිය බැවින්ද හා ඔවුන්ගෙන්ද සැලකිය යුතු ක්‍රීඩිකාවන් පිරිසක් 2027 වන විට කනිෂ්ඨ කාණ්ඩයෙන් මිදෙන බැවින්ද පළපුරුද්ද ලබා ගැනීමේ අරමුණෙන්ම කෙරෙන ජිබොල්ටා ලෝක ශූරතා තරග සංචාරයකින්ද වඩාත් සාර්ථක ප්‍රතිපල කරා ළගාවීමේ ගැටළු පැන නැගිය හැකි බවත් ලිපියෙන් ඇය දීර්ඝව කරුණු දක්වා තිබේ.
ජිබොල්ටා ලෝක ශූරතා සංචාරයේදී ශ්‍රී ලංකාව මූලික වටයේදී එංගලන්තය, වේල්සය, ජැමෙයිකාව හා ටොංගා යන ප්‍රබළතම කණ්ඩායම් සමග සී කාන්ඩයන් තරග වදියි.එහිදී ශ්‍රී ලංකාවට පළමුවෙන් මුණ ගැසෙන එංගලන්තය අවසන් වරට 2017 බොට්ස්වානා හිදී පැවැති ලෝක යොවුන් දැල්පන්දු තරගාවලියේ තෙවැනි ස්ථානය ලද කණ්ඩායමයි.
එහිදී ශ්‍රී ලංකාව මුහුණ දුන් සියලුම තරග පරාජයට පත්වෙමින් 19 වැනි (අවසන්) ස්ථානය ලැබීය.ඒ ග්‍රෙනඩාව සහභාගි නොවීමෙනි.එහිදී ශ්‍රී ලංකා කණ්ඩායමේ ප්‍රධාන පුහුණුකාරිණීය වූයේ ජානකී ගුණසේකර මහත්මියයි.
වසර 2023 කොරියාවේදීම පැවැති 12 වැනි ආසියානු යොවුන් දැල්පන්දු තරගාවලියේදී තෙවැනි ස්ථානය හිමි කර ගත් ශ්‍රී ලංකා කණ්ඩායමේ ප්‍රධාන පුහුණුකාරිණිය වූයේ අමල්කා ගුණතිලක මහත්මියයි.මැලේසියාව හා සිංගප්පූරුව එහිදී ශූරතාව හා අනුශූරතාව හිමි කර ගත්තේය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
