සිම්බාබ්වේ පිතිකරුවන් තර්ජනාත්මක ගමනක නිරතව සිටියදීත් අවසන් ඕවරයේදී ඩිල්ෂාන් මධුශංක ලබාගත් කඩුලු ත්‍රිත්වය නිසා හරාරේ නුවරදී අද (29 වැනිදා) පැවැති පළමු වැනි එක්දින තරගයේදී ශ්‍රී ලංකා කණ්ඩායම ලකුණු 07 ක තියුණු ජයක් අත්කර ගත්තේය. ලකුණ 299 ක ඉලක්කයක් කරා යමින් සිටි සිම්බාබ්වේ පිලට තරගයෙන් ජයගැනීම සඳහා අවසන් ඕවරයේදී ලකුණු 10 ක් අවශ්‍යව තිබිණ. එහෙත් මධුශංකගේ සුවිශේෂී පන්දු යැවීම හමුවේ පන්දු 6 ක් ඇතුළත කඩුලු තුනක්ම අහිමි කරගත් සිම්බාබ්වේ කණ්ඩායමට ලබාගත හැකිවූයේ කඩුලු 8 ක් දැවී ලකුණු 291 ක් පමණි.
ශ්‍රී ලංකා පිතිකරුවන් තමන්ගේ වගකීම අකුරටම ඉටුකළ බැවින් අවසන් ඕවරය දක්වාම සටනක් දීමේ අවස්ථාව පන්දු යවන්නන්ට තිබිණ. පන්දු යවන්නන් මීට වඩා පාලනයකින් යුතුව පන්දු යැවිය යුතු වූ නමුත් හරාරේ තණතීරුවෙන් ඔවුනට එතරම් සහයෝගයක් නොලැබිණ.
කෙසේ වෙතත් ශ්‍රී ලංකා කණ්ඩායම අද ලබාගත්තේ සිම්බාබ්වේ පිලට එරෙහිව ලබාගත් 50 වැනි එක්දින ජයග්‍රහණයයි. අද තරගයේදී ලබාගත් ජයග්‍රහණයත් සමගින් ශ්‍රී ලංකා කණ්ඩායම එක්දින තරගාවලිය පරාජය නොවන ස්ථානයකට පැමිණ සිටී.
ලකුණු 299 ක ඉලක්කයක් කරා යාමට පිළිපන් සිම්බාබ්වේ කණ්ඩායම එකම ලකුණක් හෝ ලබාගැනීමට පොරතුව, පළමු ඕවරයේදීම, කඩුලු දෙකක් බිඳවැටිණ. එතැනින් එක්වූ බෙන් කරන් (70) සහ තාවකාළික නායක ෂෝන් විලියම්ස් (57) දෙවැනි කඩුල්ල වෙනුවෙන් ලකුණු 118 ක සම්බන්ධතාවක් ගොඩනඟමින් ජයග්‍රහණය සඳහා අවශ්‍ය ලකුණු වේගය රඳවා ගත්හ.
කරන් සහ විලියම්ස් දෙදෙනාම ලකුණු 22 ක් ඇතුළත පිටියෙන් ඉවත්කර ගැනීමට අසිත ප්‍රනාන්දු සහ කමිඳු මෙන්ඩිස් සමත් වූ නමුත් සිකන්දර් රාසා (92) සහ ටෝනි මුන්යොංගා (43) එක්ව 6 වැනි කඩුල්ල වෙනුවෙන් ලකුණු 128 ක සම්බන්ධතාවක් ගොඩනඟමින් සිම්බාබ්වේ බලාපොරොත්තු රඳවා ගත්හ. මුලු ලකුණු සංඛ්‍යාව 267 ක් ව තිබියදී ටෝනි මුන්යොංගා දුන් පහසු උඩපන්දුවක් අතිරේක ක්‍රීඩක නුවනිඳු ප්‍රනාන්දු අතින් ගිළිහී යාමත් සමගින් සිම්බාබ්වේ බලාපොරොත්තු තවත් ඉහළ ගිය නමුත් අවසන් ඕවරයේ පන්දු තුනක් ඇතුළත ඩිල්ෂාන් මධුශංක සියල්ලම කණපිට පෙරළීය.
ඩිල්ෂාන් මධුශංක විසින් සිකන්දර් රාසා දවාගත්තේ 2022 ආසියානු කුසලාන තරගාවලියේ අවසන් තරගයේදී විරාට් කෝලි දවාගත් ආකාරයට බොහෝ සෙයින් සමාන ලෙසිනි. පිට ඉන්න පැත්තේ පන්දු රකින්නන් පුරවා දමා පා ඉන්න එල්ලයේ පන්දු යැවූ මධුශක, කරත්ත රෝදයක ගරාදි කරකැවෙන ආකාරයට විසිවී යනසේ සිකන්දර් රාසාගේ මැද ඉන්න උදුරා දැම්මේය. ඊළඟ පන්දුවට ස්කූප් පහරක් ගැසීමට ගිය බ්‍රැඩ් එවන්ස්ගේ උඩපන්දුව අසිත ප්‍රනාන්දු විසින් රැකගන්නා ලදි. අනතුරුව පැමිණි රිචඩ් න්ගරාවාට යැවූ පන්දුව ඔහුගේ කඩුල්ලට කඩා වැදුණේ එක්දින තරගයකදී කඩුලු ත්‍රිත්වයක් දවාගත් 8 වැනි ශ්‍රී ලාංකිකයා බවට ඩිල්ෂාන් මධුශංක පත්කරමිනි.
කාසියේ වාසිය දිනාගත් සිම්බාබ්වේ කණ්ඩායම පළමුවෙන් පන්දු යැවීම තෝරා ගත්තේය. එහි සාර්ථක ප්‍රතිඵල නෙළාගත් සිම්බාබ්වේ පන්දු යවන්නෝ ඕවර 36 කදී ලකුණු 161 කට ශ්‍රී ලංකා පිලේ ප්‍රබලතම පිතිකරුවන් පස්දෙනා ආපසු ක්‍රීඩාගාරයට යැවූහ. එහෙත් ජනිත් ලියනගේ සහ කමිඳු මෙන්ඩිස් එක්ව පන්දු 83 ක් ඇතුළත 6 වැනි කඩුල්ල වෙනුවෙන් ගොඩනැංවූ ලකුණු 137 ක සම්බන්ධතාව නිසා ශ්‍රී ලංකා පිතිකරුවෝ නියමිත ඕවර 50 අවසන් වන විට කඩුලු 6 ක් දැවී ලකුණු 298 ක් ලබාගත්හ.
ජනිත් ලියනගේ සහ කමිඳු මෙන්ඩිස් අතර පැවැති ලකුණු 137 ක සම්බන්ධතාවට හතරේ පහර 10 ක් සහ හයේ පහර 5 ක් ඇතුළත්ව තිබිණ. එහෙත් මෙම පහර සියල්ලම පාහේ පන්දුවේ වේගය සහ ආනතිය පිළිබඳ නිසි තක්සේරුවක යෙදෙමින්, කල් යල් බලා ගැසූ පහර විනා දඩබ්බර ලීලාවෙන් ගැසූ පහර නොවේ. ඒවායේ තිබුණේ උසස් තත්ත්වයේ පිතිකරුවන් වෙතින් පමණක් බලාපොරොත්තු විය හැකි ක්‍රිකට් පොතේ සම්මත කර තිබුණු පහරය.
මුලු ලකුණු සංඛ්‍යාව කඩුලු 5 කට 203 ක් ව තිබියදී සත්කාරකයන්ගේ සාර්ථකම පන්දු යවන්නා වූ රිචඩ් න්ගරාවා මස්පිඬු පෙරළීමක් හේතුවෙන් පිටියෙන් ඉවතට ගියේය. ඒ වන විට ඔහුගේ පන්දු යැවීම සටහන් වූයේ ඕවර 6.2-2-22-1 ක් ලෙසිනි. එහෙත් තම සගයින්ට ශ්‍රී ලංකා පිතිකරුවන් දෙදෙනාගෙන් පහර පිට පහර වදිනු දුටු න්ගරාවා නැවතත් පිටියට පැමිණ කමිඳු මෙන්ඩිස්ගේ ඉනිම නිමා කළත්, ඒ වන විට වෙන්නට තිබූ හරිය සිදුවී හමාරය.
ශ්‍රී ලංකා ඉනිමේ පස්වැනි ඕවරය නිමාවීමත් සමගින් පළමු කඩුල්ල බිඳ වැටෙන විට ලකුණු සංඛ්‍යාව වූයේ 09 කි. එතැන් සිට එක්වූ නිස්සංක සහ කුසල් මෙන්ඩිස් දෙදෙනා දෙවැනි කඩුල්ල වෙනුවෙන් ලකුණු 100 ක සම්බන්ධතාවක් ගොඩනැංවූයේ ඉනිමක් ගොඩනඟන්නේ මේ ආකාරයෙන් යයි කදිම නිදර්ශනයක් දෙමිනි.
පන්දු 63 කින් සිය 17 වැනි එක්දින අර්ධ ශතකය සම්පූර්ණ කළ පැතුම් නිස්සංක තමන්ට ලැබෙන සෑම දුර්වල පන්දුවක්ම හතරේ සීමාවෙන් එපිටට යවද්දී කුසල් මෙන්ඩිස් තැන්පත් පිතිහරඹයක නිරත විය. නිස්සංකගේ අර්ධ ශතකය සම්පූර්ණ වන විටත් පන්දු 46 කට මුහුණ දී සිටි මෙන්ඩිස් ලබා සිටියේ ලකුණු 29 කි.
පහරදීමේ අවස්ථාව පැතුම්ට පවරමින් කුසල් මෙන්ඩිස් සෙමින් ගමනක යෙදුණ නමුත් යොවුන් ක්‍රීඩක වෙස්ලි මැදව්රේගේ අති විශිෂ්ට පන්දු රැකීමක් හමුවේ මෙන්ඩිස්ට සිය කඩුල්ල අහිමි විය. තවමත් 24 හැවිරිදි වෙස්ලි මැදව්රේ සිම්බාබ්වේ ජාතික හිස්වැස්ම දිනාගත්තේ 20 වැනි වියට පිවිසීමටත් කලිනි. කුසල්ගේ පිත්තෙන් නික්මුණු පන්දුව තම හිසට ඉහළින් පියාඹා යනවා දුටු මැදව්රේ සැණෙකින් ආපසු හැරී තමන්ට පසුපසින්, හිසට ඉහලින් එන පන්දුව කෙරේ අවධානයෙන් යුතුව දිව යමින්, සුරැකිව උඩපන්දුව රැකගත්තේ නිස්සංක සහ කුසල් මෙන්ඩිස් අතර පැවැති සම්බන්ධතාව ලකුණු 100 න් අවසන් කරමිනි.
සිම්බාබ්වේ කණ්ඩායමේ නිත්‍ය කඩුලු රකින්නා වූ බ්‍රෙන්ඩන් ටේලර් ඉනිම ආරම්භයේදීම ඇඟිල්ල තුවාල කරගත්තේය. ඒ හේතුවෙන් කඩුලු රකින්නාගේ අත් ආවරණ පැළඳ පිටියට පැමිණි ක්ලයිව් මඩාන්ඩේ, ශ්‍රී ලංකා ආරම්භක පිතිකරුවාගේ ඉනිම අවසන් කළේ අගනා උඩපන්දු රැකීමකිනි. පිට ඉන්නට තරමක් ඈතින් ගිය පන්දුවට තම පිත්ත වීසිකරමින් නිස්සංක ගැසූ පහර නිසා උඩපන්දුව මඟ වැටෙන ආකාරයක් දිස්වූ නමුත් මඩාන්ඩේ දිවියකු මෙන් ඉදිරියට පනිමින් පන්දුව යටට තම අත් ආවරණ රිංගවා ගත්තේය. තුන්වැනි විනිසුරුවරයාගේ තීන්දුව වූයේ එය නිවැරදි උඩපන්දුවක් බවයි.
ලකුණු 22 ක් ඇතුළත කඩුලු 3 ක් බිඳ වැටුණු අතර නායක චරිත් අසලංක දැවී යාමත් සමගින් පස්වැනි කඩුල්ලත් ලකුණු 161 දී බිඳ වැටෙන විට ඕවර 36 ක් අවසන් වී තිබිණ. ඉතිරිව තිබුණේ ඕවර 14 කි. එතැන් සිට කමිඳු මෙන්ඩිස් තම සුපුරුදු පිතිහරඹය ප්‍රදර්ශනය කරමින් පන්දු 36 කින් ලකුණු 57 ක් ලබාගත් නමුත් ඉනිමේ අවසන් පන්දුවේදී දැවී ගියේය.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
