(නාමල් පතිරගේ)
අගෝස්තු 18 වැනිදා පැවැත්වීමට නියමිත ශ්‍රී ලංකා මලල ක්‍රීඩා ආයතනයේ නිලවරණයට (2025 - 27) නාමයෝජනා ඉදිරිපත් කළ අපේක්ෂකයන් රැසකට එරෙහිව විරෝධතා ගොනු කර ඇතැයි වාර්තාවේ. පසුගිය මැයි 21 වැනිදා අති විශේෂ ගැසට් නිවේදනයක් මගින් වත්මන් ක්‍රීඩා ඇමැති සුනිල් කුමාර ගමගේ මහතා හදුන්වා ජාතික ක්‍රීඩා සංගම් නව නියෝග මාලාවට අනුව යමින් එම විරෝධතා බහුතරයක් ඉදිරිපත් කර තිබීම කැපී පෙනේ.
නාමයෝජනා සදහා විරෝධතා බාර ගැනිම ඊයේ (1) අවසන් විය.ඒ සමගම විරෝධතා විභාග කිරීම නිලවරණ කමිටුව ඊයේම ආරම්භ කළේය. එම විරෝධතා විභාග කිරීම ලබන සදුදා (4) අවසන් කිරීමට නියමිතය.
අනතුරුව නිලවරණ කමිටුව විසින් එම විරෝධතා සම්බන්ධයෙන් සිය තීරණ ප්‍රකාශයට පත් කිරීමට කටයුතු යොදා ඇත.
සභාපති අපේක්ෂක, ට්‍රැක් මාස්ටර්ස් ක්‍රීඩා සමාජයේ සභාපති සුනිල් ගුණවර්ධන මහතාගේ නාම යෝජනාවට එරෙහිවද එහිදී විරෝධතාවයක් ඉදිරිපත් කර තිබෙන බව වාර්තාවේ. 2025 අංක1දරන ජාතික ක්‍රීඩා සංගම් නියෝග යටතේ ජාතික ක්‍රීඩා සංගමයක ධූරයක් දැරීමට නුසුදුස්සකු වන වගන්ති මාලාවේ 10 වැනි ඡේදය යටතේ ගුණවර්ධන මහතාගේ නාම යෝජනාව අභියෝගයට ලක් කරමින් එම විරෝධතාව ගොනු කර තිබේ.
එම වගන්තියේ දැක්වෙන පරිදි නාමයෝජනා ඉදිරිපත් කිරීමට පෙර වසර හතරක කාල සීමාව තුළදී වානිජ අරමුණු සහිතව ක්‍රීඩා වලට සම්බන්ධ සේවා සැපයීමේ යෙදී ඇත්නම් ඔහුට හෝ ඇය නිලවරණයට ඉදිරිපත් වීමට නුසුදුස්සකු වන බව දක්වා තිබේ.
එහිදී සුනිල් ගුණවර්ධන මහතාට එල්ලවී තිබෙන චෝදනාව වන්නේ ඔහු ශ්‍රී ලංකා ක්‍රිකට් ආයතනයට සම්බන්ධව ශාරිරික අභ්‍යාස පුහුණු උපදේශකවරයෙකු ලෙස ගෙවීම් ලබන බවයි. නාමයෝජනා රැසකට විරෝධතා එල්ලවී ඇත්තේ එම අපේක්ෂකයන් මලල ක්‍රිඩා විනිසුරුවන්, තාක්ෂණික නිලධාරීන් හා පුහුණුකරුවන් ලෙස කටයුතු කරමින් ගෙවීම් ලබන්නන් වන බවයි.
ජාතික ක්‍රීඩා සංගම් නව රෙගුලාසි මාලාවේ නිලවරණයකට ඉදිරිපත්වීමට නුසුදුස්සකු වන බවට දක්වා තිබෙන 8 වැනි වගන්තියේ දැක්වෙන්නේ නාමයෝජනා ඉදිරිපත් කිරීමට පෙර වසර දෙකක කාල සීමාව තුළ අදාළ ජාතික සංගමයේ වෘත්තිය පුහුණුකරුවෙකු, තාක්ෂණික නිලධාරීයෙකු හෝ විනිශ්චකරුවෙකු ලෙස කටයුතු කර ඇත්නම් ඔහු හෝ ඇය නිලවරණයට ඉදිරිපත් වීමට නුසුදුස්සකු වන බවයි.
කෙසේවූවත් ශ්‍රී ලංකා මලල ක්‍රීඩා ආයතනය එම ධූර වල වෘත්තියමය තත්වය පිළිබදව නිර්නායකයන් පැහැදිළි කරන ලෙස ඉල්ලා සිය නිලවරණයට (2025 - 27) නාම යෝජනා කැදවීමට කළින්ම ක්‍රිඩා අමාත්‍යාංශයෙන් ලිඛිතව විමසීමක් කළත් ඊයේ ( 1) වන තුරුත් ඊට ඔවුන් ප්‍රතිචාර දක්වා නොතිබූ බව වාර්තාවේ.
අගෝස්තු 18 වැනිදා කැදවා තිබෙන ශ්‍රී ලංකා මලල ක්‍රීඩා ආයතනයේ නිලවරණයේදී (2025- 27) සභාපති ධූරයට තරග වදින සෙසු අපේක්ෂකයන් දෙදෙනා වන්නේ වෙළද සේවා මලල ක්‍රීඩා සංගමයේ සභාපති ප්‍රසන්න ඉන්දික හා ජාතික මලල ක්‍රීඩා තේරීම් කමිටුවේ වත්මන් සභාපති, හිටපු නියෝජ්‍ය පොලිස්පති උපාලි කුමාරසිරි යන මහත්වරුන්ය.
නව ක්‍රීඩා රෙගුලාසී මාලාවට අනුව ජාතික ක්‍රීඩා සංගමයක විධායක සභාව 17 දෙනෙකුට සීමා කර තිබේ. ඒ අනුව මෙතෙක් ක්‍රියාත්මක වූ මලල ක්‍රීඩා ආයතනයේ සාමාජිකයන් 29 දෙනෙකුගෙන් සමන්විත වූ විධායක සභාව එම ගණනට සීමා කර තිබේ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
