Last Update  :  2025-08-31 15:22:00 About Contact
Follow Us -
IMG-LOGO
නිවස්න පිටුව Athletics ජාතික මලල ක්‍රීඩා ශූරතාවලියට 750 ක්

ජාතික මලල ක්‍රීඩා ශූරතාවලියට 750 ක්

editorial - 2025 ජුලි මස 31 {{hitsCtrl.values.hits}} Views 0 Comment
A A A

(නාමල් පතිරගේ)

දියගම මහින්ද රාජපක්ෂ පිටියේදී සෙනසුරාදා (2) ආරම්භ වන 103 වැනි ජාතික මලල ක්‍රීඩා තරගාවලියට ක්‍රීඩක ක්‍රීඩිකාවෝ 750 දෙනෙකු පමණ සහභාගි වීමට නියමිතය. ලබන ඉරිදාත්  (3) තරගාවලිය එහිදී පැවැත්වෙන අතර ඊට දැනට ක්‍රියාත්මක ජාතික මලල ක්‍රීඩා සංචිතයේ ක්‍රීඩක ක්‍රීඩිකාවන් 65 දෙනාද සහභාගි වෙති.

මෙවර ජාතික තරගාවලියේ වැදගත්කම වන්නේ ජපානයේ ටෝකියෝ නුවරදී ලබන සැප්තැම්බර් 13 සිට 21වැනිදා දක්වා පැවැත්වෙන ලෝක මලල ක්‍රීඩා තරගාවලියට ශ්‍රී ලංකා ක්‍රීඩික ක්‍රීඩිකාවන්ට නිර්දේෂ ලබා ගැනීමේ අවස්ථාවක්ද මෙවර එයින් උදාවී තිබීමයි. ඒ සදහා දක්ෂතා මත කෙළින්ම නිර්දේශ ලබා ගැනීමට නොහැකි ලොව රටවල ක්‍රීඩික ක්‍රීඩිකාවන්ට ලෝක මලල ක්‍රීඩා ආයතනය හදුන්වාදී තිබෙන දේශීය තරග ජයග්‍රාහණ ප්‍රසාද ලකුණු ක්‍රමය දියගමදී පැවැත්වෙන ජාතික මලල ක්‍රීඩා තරගාවලියටද යොදා ගැනේ. එහිදී ක්‍රීඩකයෙකුට හෝ ක්‍රීඩිකාවකට ඉසව් ජයග්‍රාහණයක් වෙනුවෙන් ප්‍රසාද ලකුණු 100 ක් එකතු වේ.

එළඹෙන ටෝකියෝ මලල ක්‍රීඩා ශූරතා තරගාවලියට ශ්‍රී ලංකාවෙන් මේ වන විට දක්ෂතා මත සෘජුවම නිර්දේශ ලබා ගැනීමට හෙල්ල විසි කිරීමේ ශූර සුමේධ රණසිංහ සමත්ව සිටියි. ඒ දියගමදී මාර්තු 9 වැනිදා මීටර 85.78 ක දක්ෂතාවයක් දක්වමිනි.

ඒ අතර ශ්‍රී ලංකා හෙල්ල විසි කිරීමේ ක්‍රීඩක රුමේෂ් තරංග හා හෙල්ල විසි කිරීමේ ක්‍රීඩිකා නදීෂා දිල්හානී ලේකම්ගේ මේ වන විට ප්‍රසාද ලකුණු ක්‍රමයෙන් ටෝකියෝ ලෝක ශූරතා නිර්දේශ ලබා ගැනිමේ ආසන්නයේම පසු වන බැවින් ඔවුන්ට මෙවර ජාතික තරගාවලියේ සිය ඉසව් ජයග්‍රාහණ තීරණාත්මකවී තිබේ.

ලෝක මලල ක්‍රීඩා ශූරතාවලිය  සදහා නිර්දේශ ලබා ගැනීමේ අවස්ථාව සියළු රටවල ක්‍රීඩක ක්‍රීඩිකාවන්ට අගෝස්තු මස 31 වැනිදා දක්වා හිමිව තිබේ.

මේ අතර ලබන නොවැම්බර් මාසයේ ඉන්දියාවේ රංචි නුවරදී පැවැත්වෙන දකුණු ආසියානු මලල ක්‍රීඩා ශූරතා තරගාවලිය සදහා සහභාගි කෙරෙන ශ්‍රී ලංකා කණ්ඩායම නිර්දේශ කිරීමේ තේරීම් තරගාවලියක් ලෙසත් මෙවර ජාතික තරගාවලිය යොදා ගන්නා බව ශ්‍රී ලංකා මලල ක්‍රීඩා ආයතනයේ ප්‍රධාන ලේකම් සමන් කුමාර ගුණවර්ධන මහතා පවසයි.

ඔහු පවසන්නේ දැනට ක්‍රියාත්මක ජාතික මලල ක්‍රීඩා සංචිතය ජාතික තරගාවලියේ ප්‍රතිපලයන්ට අනුව යාවත්කාළීන කෙරෙන බවයි. 

ඉරිදා පස්වරුවේදී සිදු කෙරෙන තරගාවලියේ ජය සංකේත ප්‍රදානයේදී 1969 සිට මෙරට මලල ක්‍රීඩා පරිපාලනයේ ක්‍රියාකාරිව කටයුතු කරන මෙරට ජේය්‍යෂ්ඨතම මලල ක්‍රීඩා නිලධාරියා ලෙස සැළකෙන ශ්‍රී ලංකා මලල ක්‍රීඩා ආයතනයේ හිටපු ප්‍රධාන ලේකම්, කෑගල්ල දිස්ත්‍රික් මලල ක්‍රීඩා සංගමයේ වත්මන් සභාපති ප්‍රේමා පින්නවල මහතාට උපහාර පිරිනැමේ.  එම උත්සවයේදී පින්නවල මහතාගේ දශක හයක දීර්ඝ සේවයට උපහාර දක්වමින් ලෝක මලල ක්‍රීඩා ආයතනය විසින් ප්‍රදානය කරන ලද උපහාර පදක්කම ඔහුට පැළදවීම ශ්‍රී ලංකා මලල ක්‍රීඩා ආයතනයේ සභාපති විශ්‍රාමික මේජර් ජනරාල් පාලිත ප්‍රනාන්දු මහතා ඇතුළු එහි විධායක සභාවේ සහභාගිත්වයෙන් සිදු කෙරේ. 


අදහස් (0)

ජාතික මලල ක්‍රීඩා ශූරතාවලියට 750 ක්

ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.