(නාමල් පතිරගේ)
ජර්මනියේදී රයින් නුවරදී අද (27) නිමාවට පත්වූ ලෝක විශ්ව විද්‍යාල ක්‍රීඩා උළෙලට සහභාගි වූ ශ්‍රී ලංකා ක්‍රීඩිකා රසාරා විජේසූරිය පෙරේදා (26) මීටර 5000 (කාන්තා) ඉසව්වෙන් නව ශ්‍රී ලංකා වාර්තාවක් පිහිටූවීමට සමත් වූවාය.
මෙම ක්‍රීඩා උලෙළේදී රසාරා පිහිටු වූ දෙවැනි ශ්‍රී ලංකා වාර්තාව මෙයයි. පෙරේදා මීටර 5000 (කාන්තා) ඉසව්වේ අවසන් තරගය එහි සිය මෙතෙක් හොදම පෞද්ගලික දක්ෂතාවය වන විනාඩි15.තත්පර 52.60 කට නිමා කරමින් අට වැනි ස්ථානයට පත් රසාරා එහි අළුත්ම ශ්‍රී ලංකා වාර්තාලාභීණිය වූවාය.
එය වසර 2021 ඔක්තෝබර් 21 වැනිදා කොළඹදී ගයන්තිකා අබේරත්න විසින් විනාඩි 16 තත්පර 00.30 ට පිහිටුවා තිබූ එහි එතෙක් පැවැති ශ්‍රී ලංකා වාර්තාවේ බිද වැටීම විය.
කැළණිය විශ්ව විද්‍යාලයේ උපාධි අපේක්ෂිකාවක් වන රසාරා මීට දින කීපයකට ඉහතදී (ජූලි 21 වැනිදා) මෙම ක්‍රීඩා උළෙලේදීම මීටර 10,000 ( කාන්තා) ඉසව්වෙන් නව ශ්‍රී ලංකා වාර්තාවක් පිහිටුවීමටද සමත් වූවාය.
ඇය මීටර 5000 (කාන්තා) ඉසව්වේ මූලික වටයේදී විනාඩි 15.තත්පර 55.60 ක දක්ෂතාවයක් දක්වමින් එහි ඊයේ පැවැති අවසන් තරගයට නිර්දේශ ලබා ගත්තාය. ජර්මනියේ පැවැති ලෝක විශ්ව විද්‍යාල ක්‍රීඩා උළෙලේ මීටර 5000 ( කාන්තා) ඉසව්වේ රන් පදක්කම්ලාභීණිය වූයේ ප්‍රංශයේ ජූලියා ඩේවිඩි ස්මිත් විසිනි. ඒ විනාඩි 15 තත්පර 34.57 කටය.
ජර්මනියේදී අද නිමාවට පත්වූ ලෝක විශ්ව විද්‍යාල ක්‍රීඩා උළෙලට ශ්‍රී ලංකාවෙන් ක්‍රීඩක ක්‍රීඩිකාවන් 27 දෙනෙකු සහභාගි වූහ. ඉන් 11දෙනෙකු මලල ක්‍රීඩක ක්‍රීඩිකාවෝ වූහ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
