(නාමල් පතිරගේ )
අගෝස්තු 16 වැනිදා ආරම්භ වීමට නියමිත ඩයලොග් - ජනාධිපති රන් කුසලාන (2025) වොලිබෝල් තරගාවලිය සදහා කණ්ඩායම් 4000 ක් පමණ අපේක්ෂා කරන බව ශ්‍රී ලංකා වොලිබෝල් සම්මේලනය පවසයි.
කොළඹදී පැවැති මාධ්‍ය හමුවකදී ශ්‍රී ලංකා වොලිබෝල් සම්මේලනයේ සභාපති, ජේය්‍යෂ්ඨ නියෝජ්‍ය පොලිස්පති සජීව මැදවත්ත මහතා පැවසුවේ තරගාවලියට කණ්ඩායම් වෙතින් ඇයැදුම්පත් බාර ගැනීම අගෝස්තු 10 වැනිදා දක්වා දීර්ඝ කර තිබෙන බවයි.
අගෝස්තු 16 වැනිදා තරගාවලියේ සමාරම්භක උත්සවය බස්නාහිර පළාත් තරග වටයට සමගාමීව කොළඹ ටොරිංටන් ක්‍රීඩා සංවර්ධන දෙපාර්තමේන්තු ක්‍රීඩාංගණයේදී පැවැත්වීමෙන් මෙවර තරගාවලියේ මූලික වටය ආරම්භ කෙරේ.
මූලික වටය ලෙස ආරම්භ වන පළාත් තරග වටයේදී දිස්ත්‍රික් ශූරතාව හා අනුශූරතාව ලබන කාන්තා හා පිරිමි කණ්ඩායම් 36 ක් ජාතික (අවසන්) තරග වටයට නිර්දේෂ කෙරේ.එයින් ලබන නොවැම්බර් මාසයේදී පවත්වා අවසන් කෙරෙන අවසන් මහ තරග (කාන්තා හා පිරිමි) තරග දෙක සදහා කණ්ඩායම් තෝරා ගැනේ.
දිවයිනේ ඕනෑම ප්‍රාදේශීය ලේකම් කොට්ඨාශයකට අයත් ලියාපදිංචි ක්‍රීඩා සමාජ හා කණ්ඩායම් වෙත තරගාවලියට ඇයැදුම් කළ හැකිය. කණ්ඩායම් සදහා ඇතුළත් කෙරෙන ක්‍රීඩකයන් හෝ ක්‍රීඩිකාවන් වයස 25 න් පහළ අදාළ ප්‍රාදේශීය ලේකම් කොට්ඨාශයේ අවම වසර දෙකක කාලයක් පදිංචිවූවන් වීම තරග කොන්දේසියකි.
වසර 1991 දී එවකට ජනාධිපති රණසිංහ ප්‍රේමදාස මහතාගේ ප්‍රධානත්වයෙන් පළමු ජනාධිපති රන් කුසලාන වොලිබෝල් තරගාවලියේ අවසන් මහ තරගය කොළඹ සුගතදාස ගෘහස්ථ පිටියේදී පවත්වා තිබේ. මෙම තරගාවලියට වසර 2005 සිට ඩයලොග් ආසියාටා - පී.එල්.සී.සමාගම නිල අනුග්‍රාහය දක්වයි.
තරග ඇයැදුම්පත් ලේකම්, ජනාධිපති රන් කුසලාන වොලිබෝල්, ශ්‍රී ලංකා වොලිබෝල් සම්මේලනය, අංක 33, නිදහස් චතුරස්‍රය, කොළඹ 7 යන ලිපිනයට යොමු කළ යුතුය.
ඩයලොග් ජනාධිපති රන් කුසලාන වොලිබෝල් තරගාවලියට (2025) අනුග්‍රහය දක්වන ඩයලොග් - ආසිආටා පී.එල්.සී.ආයතනය වෙනුවෙන් එහි සමූහ ප්‍රධාන අලෙවි නිලධාරී ලසන්ත තෙවරප්පෙරුම මහතා විසින් ශ්‍රී ලංකා වොලිබෝල් සම්මේලනයේ සභාපති ජ්‍යේෂ්ඨ නියෝජ්‍ය පොලිස්පති සජීව මැදවත්ත මහතා වෙත අනුග්‍රාහය නිල වශයෙන් ප්‍රදානය කළ අවස්ථාව. ඩයලොග් - ආසිආටා පී.එල්.සී.ආයතනයේ උප සභාපති (සමූහ අලෙවි) හර්ෂ සමරනායක මහතා සහ ශ්‍රී ලංකා වොලිබෝල් සම්මේලනයේ උප සභාපති මහින්ද සෙනෙරත් බන්ඩාර මහතාද ඡායාරූපයේ වෙති.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
