2028 ලොස් ඇන්ජලීස් ඔලිම්පික් උළෙලේ ක්‍රිකට් ඉසව්ව සඳහා කණ්ඩායම් තෝරාගනු ලබන්නේ ලෝක ශ්‍රේණිගත කිරීම්වලට අනුව නොවන බවත්, මහාද්වීප මට්ටමින් පවත්වනු ලබන තේරීම් තරගවලට අනුව බවත් එංගලන්ත සහ වේල්ස් ක්‍රිකට් පාලක මණ්ඩලයේ සභාපති රිචඩ් තොම්සන් මහතා පවසයි.
වසර 128 ක ඉතිහාසයක් ඇති ඔලිම්පික් උළෙලට ක්‍රිකට් ක්‍රීඩාව ඇතුළත් වන පළමු අවස්ථාව මෙය වන අතර 2028 ලොස් ඇන්ජලීස් ඔලිම්පික් උළෙලේදී ක්‍රිකට් ඉසව්ව කණ්ඩායම් හයකින් සමන්විත විස්සයි-20 තරගාවලියක් ලෙස පැවැත්වීමට නියමිතය.
එම තරගාවලිය සඳහා කණ්ඩායම් තෝරාගන්නා ආකාරය නැතහොත් සුදුසුකම් ලැබීමේ ක්‍රියා පටිපාටිය තවමත් අවසන් වශයෙන් සකස්කර නොමැති බවත්, එය ලෝක ශ්‍රේණිගත කිරීම්වලට අනුව නොව භූගෝලීය වශයෙන් තීරණය කරනු ලබන බවත් තොම්සන් මහතා එහිදී වැඩි දුරටත් පැවසීය.
“ජාත්‍යන්තර ඔලිම්පික් කමිටුවේ ආරාධනයකට අනුව අපි ඒ සම්බන්ධයෙන් ඔවුන් සමග සාකච්ඡා කළා. ඔවුන් මොන විධියෙ තීරණයක් ගත්තත් අවසානයේ අපිට ඔවුන්ගේ නීතිරීතිවලට අනුකූල වෙන්න සිද්ධ වෙනවා.” යැයි තොම්සන් මහතා බී.බී.සී. පුවත් සේවය වෙත අදහස් දක්වමින් කියා සිටියේය.
“තේරීම් ක්‍රියා පටිපාටිය තවමත් සකස් කෙරෙමින් තියෙන්නෙ. ඒත් ජාත්‍යන්තර ඔලිම්පික් කමිටුවේ කැමැත්ත හැම මහාද්වීපයක්ම නියෝජනය වෙන විධියට කණ්ඩායම් තෝරාගනිමින් පස් වළලු මූලධර්මයට අනුව වැඩ කිරීමයි. එහෙම වුණොත් යුරෝපා මහද්වීපයේ තේරීම් තරගාවලියට එංගලන්තය, අයර්ලන්තය සහ ස්කොට්ලන්තය යන කණ්ඩායම් නියෝජනය වෙන විධියට මහා බි්‍රතාන්‍යය නමින් කණ්ඩායමක් ඉදිරිපත් කිරීමට අපි බලාපොරොත්තු වෙනවා.” යැයිද එහිදී ඔහු කීය.
තොම්සන් මහතා පවසන පරිදි මහද්වීප මට්ටමින් ඔලිම්පික් උළෙලේ ක්‍රිකට් ඉසව්ව සඳහා කණ්ඩායම් තෝරා ගැනීමට ජාත්‍යන්තර ඔලිම්පික් කමිටුව පියවර ගතහොත් ආසියා, අප්‍රිකා, ඕස්ටේ්‍රලියා, යුරෝපා, උතුරු ඇමරිකා සහ දකුණු ඇමරිකා යන මහද්වීප 6 ට ලොස් ඇන්ජලීස් ඔලිම්පික් උළෙල සඳහා ඉදිරිපත් කිරීමට හැකි වන්නේ එක් කණ්ඩායම බැගින් පමණි.
ඒ අනුව ආසියානු මහද්වීපයෙන් ඉන්දියාව, ශ්‍රී ලංකාව, පාකිස්තානය, බංග්ලාදේශය, ඇෆ්ඝනිස්ථානය සහ නේපාලය යන කණ්ඩායම්වලින් එකකට පමණක් ඔලිම්පික් උළෙලට සහභාගි වීමේ අවස්ථාව හිමවනු ඇත. ඇතැම් විට වෙනමම තේරීම් තරගාවලියක් නොපවත්වා ආසියානු කුසලාන තරගාවලියේ ශූරයන් බවට පත්වන කණ්ඩායමට එම අවස්ථාව හිමිවීමටද ඉඩකඩ තිබේ.
-036
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
