Last Update  :  2025-08-30 19:11:00 About Contact
Follow Us -
IMG-LOGO
නිවස්න පිටුව Motorsports යෙවාන්ට යළිත් පෙරමුණ මඟ හැරෙයි
ෆෝමියුලා-1 තරගාවලිය

යෙවාන්ට යළිත් පෙරමුණ මඟ හැරෙයි

editorial - 2025 ජුලි මස 27 {{hitsCtrl.values.hits}} Views 0 Comment
A A A

(ශානුක අරවින්ද) 

‘යූරෝ ෆෝමියුලා’ ශූරතාව සඳහා යුරෝපී රටවල්වලදී පැවැත්වෙන ෆෝමියුලා-1 තරගාවලි මාලාවේ මුල් අදියර 3 පුරා ලකුණු සටහනේ පෙරමුණ ගෙන සිටි ශ්‍රී ලංකාවේ යෙවාන් ඩේවිඩ්ට, එහි සිවුවැනි සහ පස්වැනි අදියර නිමාවන විට එහි දෙවැනි ස්ථානය දක්වා පසුබැසීමට සිදුව ඇත. 

එම තරග මාලාවේ පස්වැනි අදියර ලෙස ප්‍රංශයේ සර්කිට් පෝල් රිකාඩ් ධාවන පථයේදී පැවැති ෆෝමියුලා-1 තරගාවලියේ පළමු තරගය 2 වැනියා ලෙස නිමා කිරීමට ඩේවිඩ් සමත් වුවද, එහි දෙවැනි සහ තෙවැනි තරගවලදී ඔහු පිළිවෙළින් 12 වැනි සහ 10 වැනි ස්ථානවලට පත්විය. ඒ අනුව මෙම තරගාවලියේදී ඔහු හිමිකරගත් ලකුණු සංඛ්‍යාව 19 කි.

මෙම තරගාවලියට පෙර ලකුණු 194 ක් ලබා ලකුණු සටහනේ දෙවැනි ස්ථානයේ පසුවූ ඩේවිඩ්, මෙම තරගාවලියේදී ලබාගත ලකුණු 19 ත් සමග සිය මුලු ලකුණු සංඛ්‍යාව 213 ක් දක්වා ඉහළ දමාගත්තේය. එහෙත් නැවත වරක් ලකුණු සටහනේ පෙරමුණට පැමිණීමට තරම් ඔහුට එම ලකුණු සංඛ්‍යාව ප්‍රමාණවත් නොවීය. 

මෙම තරගාවලියේදී පිළිවෙලින් පළමු ස්ථානයක්, තෙවැනි ස්ථානයක් සහ දෙවැනි ස්ථානයක් සමග ලකුණු 58 ක් ලබාගත් ටයිමෙක් කුචර්සික් මුලු ලකුණු 230 ක් ලබා ලකුණු සටහනේ පෙරමුණට පැමිණියේය. ලකුණු සටහනේ පෙරමුණේ පසුවූ මයිකල් ෂින්ට මෙම තරගාවලියේදී ලබාගත හැකි වූයේ සිවුවැනි ස්ථානයක් සහ 9 වැනි ස්ථානයක් පමණක් බැවින් ඔහු ලකුණු සටහනේ තෙවැනි ස්ථානය දක්වා ඇද වැටිණ. 

මෙම තරගා මාලාවේදී එක් තරගයක පළමු ස්ථානය සඳහා ලකුණු 25 ක්ද, දෙවැනි ස්ථානය සඳහා ලකුණු 18 ක්ද, තෙවැනි ස්ථානය සඳහා ලකුණු 15 ක්ද, සිවුවැනි ස්ථානය සඳහා ලකුණු 12 ක්ද, පස්වැනි ස්ථානය සඳහා ලකුණු 10 ක්ද, හයවැනි ස්ථානය සඳහා ලකුණු 8 ක්ද, හත්වැනි ස්ථානය සඳහා ලකුණු 6 ක්ද, අටවැනි ස්ථානය සඳහා ලකුණු 4 ක්ද, නමවැනි ස්ථානය සඳහා ලකුණු 2 ක්ද, 10 වැනි ස්ථානය සඳහා ලකුණු 1 ක්ද, ඉදිරිපෙළ තරග ආරම්භක ස්ථානය සහ වේගවත්ම වටය සඳහා එක් ලකුණ බැගින්ද ලබා දෙනු ඇත. 

මෙය යෙවාන්ගේ පළමු ‘යූරෝ ෆෝමියුලා’ තරගාවලි මාලාව වන අතර මින් පෙර පැවැති තරගාවලි 4 දීම දක්ෂතම නැඟී එන ක්‍රීඩකයාට හිමි සම්මානය දිනාගැනීමටද ඔහු සමත් විය. මෙම තරගාවලියේදී ඔහුට දක්ෂතම නැඟී එන ක්‍රීඩකයාට හිමි සම්මානය අහිමි වී ගිය නමුත් සමස්ත තරග මාලාවේ එම සම්මානය සඳහා වන ලකුණු සටහනේ ලකුණු 136 ක් ලබා තරවදුරටත් පෙරමුණ රැකගැනීමට ඔහුට හැකි විය. 

‘යූරෝ ෆෝමියුලා’ තරගාවලි මාලාවේ තවත් අදියර 3 ක් මෙම වසර තුළදී පැවැත්වීමට නියමිතව තිබේ. එම තරගාවලි සැප්තැම්බර් මස 11 වැනිදා සිට 13 වැනිදා දක්වා ඕස්ටි්‍රයාවේදීද, සැප්තැම්බර් මස 25 වැනිදා සිට 27 වැනිදා දක්වා ස්පාඤ්ඤයේදීද, ඔක්තෝබර් මස 16 වැනිදා සිට 18 වැනිදා දක්වා ඉතාලියේදීද පැවැත්වීමට නියමිතය. 


අදහස් (0)

යෙවාන්ට යළිත් පෙරමුණ මඟ හැරෙයි

ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.