සචින්ගේ පුත් අර්ජුන් ශ්‍රී ලංකාවට එයි

ලබන මාසයේදී ශ්‍රී ලංකාවේ තරග සංචාරයක නිරතවීමට නියමිත ඉන්දීය වයස 19 න් පහළ ක්‍රිකට් සංචිතයේ ස්ථානයක් හිමිකර ගැනීමට හිටපු ඉන්දීය පිතිකරු සචින් තෙන්ඩුල්කාර්ගේ පුත් අර්ජුන් තෙන්ඩුල්කාර් සමත්ව සිටී. එහෙත් අර්ජුන් තෙන්ඩුල්කාර් සිය පියා මෙන් පිතිකරුවකු නොව වමතින් වේග පන්දු යවන්නෙකි.

පසුගිය වසරේ පැවැති කූච් බෙහාර් කුසලාන සඳහා මුම්බායි වසය 19 න් පහළ කණ්ඩායම නියෝජනය කර කඩුලු 18 ක් දවාගනිමින් දැක්වූ දක්ෂතා හේතුවෙන් වමතින් වේගපන්දු යවන අර්ජුන් තෙන්ඩුල්කාර්ට ඉන්දීය වයස 19 න් පහළ ක්‍රිකට් සංචිතයේ ස්ථානයක් හිමිවීමට ප්‍රමාණවත් විය.

ක්‍රිකට් පුහුණු දැළ තුලදී ජාත්‍යන්තර මට්ටමේ පිතිකරුවන්ටත් පන්දුයවා ඇති අර්ජුන් පසුගිය වසරේ ලෝඞ්ස් ක්‍රීඩාංගණයේදී එංගලන්තය සහ දකුණු අප්‍රිකාව අතර පැවැති තරගයට පෙර පැවැති පුහුණු සැසියකදී යවන ලද යෝකර් පන්දුවක් හේතුවෙන් එංගලන්ත ක්‍රීඩක ජොනී බෙයාස්ටෝ ආබාධයකට ලක්විය.

සිවුදින තරග දෙක සඳහා නම්කරන ලද සංචිතයට පමණක් අර්ජුන් තෙන්ඩුල්කාර් නම්කර ඇති අතර එම තරග දෙක අනුජ් රාවට් විසින් මෙහෙයවනු ලබයි.

තරග 5 කින් සමන්විත එක්දින තරගාවලිය මෙහෙයවීමේ වගකීම ආර්යන් ජුයාල් හට හිමිවී ඇත. එහෙත් අර්ජුන් තෙන්ඩුල්කාර්ට එක්දින තරගාවලියේදී කණ්ඩායමේ ස්ථානයක් හිමිවී නැතැයි කියැවේ.