සැප්තැම්බර් මස 20 සහ 21 යන දිනවල චීනයේ හැංසොව් විශ්ව විද්‍යාල ක්‍රීඩාංගණයේදී පැවැත්වෙන ආසියානු සත් සාමාජික රග්බි තරගාවලියේ පළමු අදියරට සහභාගි වන ශ්‍රී ලංකා සංචිතයේ නායකත්වය කවිඳු පෙරේරාට හිමිව තිබේ.
ලෝක රග්බි ශ්‍රේණිගත කිරීම්වලට අනුව ආසියාවේ හොඳම කණ්ඩායම් 12 සහභාගි වන මෙම තරගාවලිය අදියර දෙකක් යටතේ පැවැත්වෙන අතර එහි දෙවැනි අදියර ඔක්තෝබර් මස 18 සහ 19 යන දිනවල කොළඹ තුරඟ තරග පිටියේදී පැවැත්වීමට නියමිතය.
මහනුවර විද්‍යාර්ථ විදුහලේ ආදි සිසුවකු වන විංග් ක්‍රීඩක කවිඳු පෙරේරා, පසු කළෙක සී.ආර්. ඇන්ඩ් එෆ්.සී. ක්‍රීඩා සමාජය නියෝජනය කළ අතර මේ වන විට ඔහු මහනුවර ක්‍රීඩා සමාජයට ක්‍රීඩා කරමින් සිටියි. මේ වන විට 31 වැනි වියේ පසුවන කවිඳු, ජාත්‍යන්තර තරගාවලි රැසකදී ශ්‍රී ලංකාව නියෝජනය කළ ක්‍රීඩකයෙකි.
තරගාවලියට සහභාගිවන ක්‍රීඩකයන් 23 දෙනෙකුගෙන් සමන්විත ශ්‍රී ලංකා මූලික සංචිතය ශම්ලි නවාස් මහතාගේ සහ රජීව් පෙරේරා මහතාගේ පුහුණුකාරීත්වය යටතේ මේ දිනවල පුහුණුවීම්වල නිරත වෙමින් සිටියි. පුහුණුවීම් අවසානයේ තරගාවලියට සහභාගි වන අවසන් සංචිතය නම් කිරීමට නියමිතය.
ශ්‍රී ලංකා සත් සමාජික රග්බි මූලික සංචිතය
කවිඳු පෙරේරා (නායක), ආකාෂ් මධුෂංක, දිනාල් ඒකනායක, ජනිඳු විජේරත්න, යෙහාන් බුලත්සිංහල, ජයතු රාජරත්න, නාලන් දේශප්‍රිය, රවිඳු හෙට්ටිආරච්චි, ගයාන් පෙරේරා, ළහිරු තිලකරත්න, මොහොමඩ් රිෆාන්, කළණ චමුදිත, ඒරන් කොරෙයා, දේවින්ද රත්නායක, නිස්රාන් නිලාර්, හේෂාන් ජැන්සන්, විෂේන්ක සිල්වා, දනුෂ් දංගේ, චතුර සොයිසා, ශාහිඩ් සුම්රි, සුරංග තෙන්කෝන්, ජනිත් මාරසිංහ සහ ශෂික ප්‍රනාන්දු
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
