මිනුවන්ගොඩ නාලන්දාවට වාර්තාගත ජයක්

(ශානුක අරවින්ද)

අන්තර් පාසල් වයස 13 න් පහළ ක්‍රිකට් තරගාවලියේ I කොටසේ මූලික වටයේ තරගයකදී බණ්ඩාරවත්ත පරාක්‍රම විදුහල ලකුණු 8 කට සීමා කිරීමට මිනුවන්ගොඩ නාලන්දා විදුහල සමත්ව තිබේ. මෙවර තරග වාරයේ මේ දක්වා පැවැති තරගවලදී කණ්ඩායමක් දැවී ගිය අඩුම ලකුණු සංඛ්‍යාවද මෙය විය.

පළමුවෙන් පන්දුවට පහරදුන් නාලන්දා මැදි විදුහල ඕවර 25 ක් අවසානයේ කඩුලු 6 ක් දැවී ලකුණු 146 ක් ලබාගැනීමෙන් අනතුරුව සිය ඉනිම අත්හිටුවා බණ්ඩාරවත්ත පරාක්‍රම විදුහලට පන්දුවට පහරදීමට ආරාධනා කර ඇත.

අනතුරුව බණ්ඩාරවත්ත පරාක්‍රම විදුහලේ පළමු ඉනිම ලකුණු 35 කට සීමා කළ නාලන්දා විදුහල් පන්දු යවන්නෝ, දෙවැනි ඉනිම ලකුණු 8 කට සීමාකරමින් මෙම තරගය ඉනිමකින් සහ ලකුණු 103 කින් ජයගැනීමට සමත් වූහ.

එහිදී නාලන්දා විදුහලේ කුසල් නිමේෂ් පන්දු 56 කදී හයේ පහරක් සහ හතරේ පහර 9 ක් සමග ලකුණු 59 ක් රැස්කරමින්ද, ඉනිම් දෙකේදී ලකුණු 24 කට කඩුලු 12 ක් බිඳහෙළමින්ද කැපී පෙනෙන දස්කම් දැක්වූවේය.

නාලන්දා මැදි විදුහල් පළමු ඉනිම - ඕවර 25 කදී කඩුලු 6 ක් දැවී 146
(කුසල් නිමේෂ් 59, දනූප අෂ්වින් 2, ජී.ඒ. ශෂිංක 46/2)

බණ්ඩාරවත්ත පරාක්‍රම විදුහල් පළමු ඉනිම - ඕවර 23 කදී සියලු දෙනා දැවී 35
(කුසල් නිමේෂ් 18/6, රෙසඳ නිමංස 03/2)

බණ්ඩාරවත්ත පරාක්‍රම විදුහල් දෙවැනි ඉනිම - ඕවර 18.1 කදී සියලු දෙනා දැවී 08
(කුසල් නිමේෂ් 06/6, රෙසඳ නිමංස 02/3)