පාකිස්තානයේ රාවල්පිණ්ඩි නුවරදී අද (29 වැනිදා) පැවැති අවසන් තරගයේදී ශ්‍රී ලංකාව පරාජය කරමින් කඩුලු 6 ක ජයක් අත්කරගත් පාකිස්තානු කණ්ඩායම තුන්කොන් තරගාවලියේ කුසලානය දිනාගත්තේය. පාකිස්තානු දඟ පන්දු යවන්නන් හමුවේ අන්ත අසරණ වු ශ්‍රී ලංකා පිතිකරුවන් ලකුණු 114 කට දැවී ගිය අතර පාකිස්තානුවෝ ඕවර 18.4 කදී කඩුලු 4 කට ලකුණු 118 ක් ලබාගත්හ.
කිසිදු අපහසුතාවකින් තොරවම පාකිස්තානයට කුසලානය දිනා දුන් මැදපෙළ පිතිකරුවෝ කඩුලු 2 කට ලකුණු 98 ක් ලබා සිටි නමුත් නායක සල්මන් අඝා සහ ෆකර් සමාන් දෙදෙනාම ගැසූ හිතුවක්කාර පහර දෙකක් හමුවේ දැවී ගියහ. එයින් සිදුවූයේ පවන් රත්නායකට කඩුලු දෙකක් ලැබීම පමණි. පළපුරුදු වෘත්තිකයකු වන බාබර් අසාම් නොදැවී ලකුණු 37 ක් ලබාගනිමින් පාකිස්තානය කඩඉමෙන් එතෙර කළේය.
තරගයේ 11 වැනි ඕවරයේදී ශ්‍රී ලංකා ලකුණු පුවරුව කියැවුණේ කඩුලු 1 ට 84 ක් ලෙසිනි. එහෙත් කුසල් මෙන්ඩිස් දැවී යාමත් සමගින් ශ්‍රී ලංකා පිලේ කඩුලු 9 ක් ලකුණු 30 ඇතුළතදී ඇද වැටිණ.
පිට පිටම පැවැති තරග දෙකකදී සිම්බාවේ පිලට එරෙහිව (148/1) සහ පාකිස්තානු කණ්ඩායමට එරෙහිව (184/5) සාර්ථක පිතිහරඹයක නිරත වූ ශ්‍රී ලංකා කණ්ඩායම ඒ ක්‍රීඩාංගණයේදීම ලකුණු 30 කට කඩුලු 9 ක් අහිමිකර ගැනීම ඇදහිය නොහැක්කකි.
ආරම්භක පිතිකරු කමිල් මිෂාර සහ අංක 3 පිතිකරු කුසල් මෙන්ඩිස් එක්ව තමන්ගේ රාජකාරිය අකුරටම ඉටු කළහ. පැතුම් නිස්සංක ලකුණු 11 කට දැවී ගිය නමුත් පාකිස්තානු පන්දු යවන්නන් ගල ග්‍රහයෙන් ගත් කමිල් මිෂාර, මුහුණ දුන් 37 වැනි පන්දුවේදී සිය අර්ධ ශතකය සම්පූර්ණ කළේය. පන්දු යවන්නන් මට්ටු කිරීමේ අවසරය කමිල් මිෂාරට දුන් කුසල් මෙන්ඩිස් කණ්ඩායමේ කේන්ද්‍රීය ඉනිම ක්‍රීඩා කිරීමට සූදානමින් සිටියේය.
මෙන්ඩිස් දැවී ගියේ බාබර් අසාම්ගේ අති විශිෂ්ට උඩපන්දු රැකීමකිනි.
එතැන් සිට පැමිණි පිතිකරුවෝ පෙරහැරක් යන්නාක් මෙන් එකා පසුපස එකා ආපසු ක්‍රීඩාගාරයට ගියහ. බාබර් අසාම් උඩපන්දු තුනකටම හිමිකම් කී අතර ෆකර් සමාන් විසින් දසුන් ශානකගේ උඩපන්දුව හොඳින් රැකගන්නා ලද නමුත් තුන්වැනි විනිසුරුවරයාගේ නිගමනය වූයේ එය නොදැවීමක් බවයි. එහෙත් ශහීන් ෂා අෆ්රීඩි යැවූ ඊළඟ පන්දුව කඩුල්ලේ වැදීමෙන් දසුන් දැවී ගිය පසුවත්, පාකිස්තානු ක්‍රීඩකයෝ “හව් ඊස් දැට්” යයි කියමින් ඉල්ලීමක් කළේ විනිසුරුවරුන්ට සරදම් කරමිනි.
කාසියේ වාසිය දිනාගත් පාකිස්තානු නායක සල්මන් අලි අඝා පළමුවෙන් පන්දු යැවීම තෝරා ගත්තේය. ශ්‍රී ලංකා කණ්ඩායම වෙනසකින් තොරව පිටියට පිවිසි නමුත් පාකිස්තානුවෝ මොහොමඩ් වසිම් බංකුවේ තියා ශහීන් ශා අෆ්රීඩි කණ්ඩායමට කැඳවා ගත්හ. පාකිස්තානු එක්දින නායකයා වන අෆ්රීඩි තමන්ගේ පැමිණීම සාධාරණීකරණය කලේ ඕවර 3 කින් කඩුලු 3 ක් දවාගනිමිනි.
තණතීරුව බෙහෙවින් දුඹුරු පැහැගත් තණතීරුවකි. එය රාවල්පිණ්ඩි නුවරදී සාමාන්‍යයෙන් දකින්නට තිබෙන තණතීරුවට වඩා බෙහෙවින් වෙනස් ආකාරයේ තණතීරුවක් වු අතර පාකිස්තානු දඟ පන්දු යවන්නන් වූ අබ්රාර් අහමඩ්, සයිම් අයුබ් සහ මොහොමඩ් නවාස් කඩුලු 6 ක් බෙදාගත්හ.
- 213
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
