මහනුවර දෙවැනි තැනට වැටෙයි

‘ඩයලොග්’ කුසලාන පළමු කොටසේ ලීග් රග්බි තරගාවලියේ දෙවැනි වටයේ පස්වැනි සතියේ තරග අවසන් වන විට මහනුවර ක්‍රීඩා සමාජය ප්‍රසාද ලකුණු සටහනේ දෙවැනි ස්ථානයට ඇද වැටී සිටියේය.

දෙවැනි ස්ථානයේ සිටි හැව්ලොක්ස් පිල තරග 12 න් 11 ක් ජය ලබමින් ප්‍රසාද ලකුණු 64 ක් හිමිකරගනිමින් පළමු ස්ථානයට පැමිණ සිටියි.

මහනුවර පිල පස්වැනි සතියේ තරගයේදී සී. එච්. පිල හමුවේ ලකුණු 33-17 ක් ලෙස පරාජයට පත්ව දෙවැනි පරාජය ලැබීය. මහනුවර පිල පසුගිය සතියේ තරගයේදී ඔවුන්ගේ ප්‍රබල ක්‍රීඩකයන් කීපදෙනකුගෙන් තොරව ක්‍රීඩා කිරීමෙන් කණ්ඩායම තරමක් දුර්වල විය.

ජාතික කණ්ඩායම නියෝජනය කරන සහ නියෝජනය කළ ක්‍රීඩකයන් වැඩි සංඛ්‍යාවක් ඇතුළත්ව සිටින මහනුවර පිල මෙවර තරග දෙකක් පරාජයට පත්වීම කැපී පෙනේ. සී. එච්. පිල සහ සී. ආර්. පිල ප්‍රසාද ලකුණු සටහනේ තෙවැනි සහ සිවුවැනි ස්ථානවල පසුවෙති.