(නාමල් පතිරගේ)
ශ්‍රී ලංකා ක්‍රිකට් කණ්ඩායමේ ප්‍රධාන පුහුණුකරු කැමැත්තෙන් ඉවත් නොවන්නේ නම් පුහුණු කාර්ය මණ්ඩලය සඳහා ඔහුට ඉහළින් උපදේශකවරයකු පත් කිරීමට සිදුවන බව ක්‍රීඩා ඇමැති හරින් ප්‍රනාන්දු මහතා පවසයි.
එංගලන්තයේදී දැන් පැවැත්වෙන ලෝක කුසලාන ක්‍රිකට් තරගාවලියේ මූලික වටයෙන් ශ්‍රී ලංකාව පරාජයට පත්වීමෙන් පසුව ඇතිවී තිබෙන තත්ත්වය පිළිබඳව ‘ලංකාදීප’ය කළ විමසුමකදී ඇමැතිවරයා එසේ පැවසීය.
ලෝක කුසලාන තරගාවලිය නැරඹීමට එංගලන්තය බලා පිටත්ව ගොස් සිටි ක්‍රීඩා ඇමැතිවරයා අද (7) රාත්‍රීයේදී යළි දිවයිනට පැමිණීමට නියමිතව තිබුණි.
ඒ අතර වාර්තා වන්නේ ලෝක කුසලාන තරගාවලියේ පරාජයෙන් පසුව ශ්‍රී ලංකා ක්‍රිකට් කණ්ඩායම සම්බන්ධයෙන් ඉදිරියේදී ගතයුතු ක්‍රියාමාර්ග ගණනාවක් පිළිබඳව ලන්ඩන් නුවරදී ක්‍රීඩා ඇමැතිවරයා හා ශ්‍රී ලංකා ක්‍රිකට් ආයතනයේ සභාපති ෂම්මි සිල්වා මහතා අතර විශේෂ සාකච්ඡාවක් පැවැත්වුණු බවයි.
කෙසේ වුවත් ඒ සම්බන්ධයෙන් දෙපාර්ශ්වය අතර වැඩි දුරටත් සාකච්ඡා ශ්‍රී ලංකා ක්‍රිකට් සභාපතිවරයා දිවයිනට පැමිණීමෙන් පසුව සිදු කිරීමට නියමිතය. ක්‍රිකට් සභාපති ෂම්මි සිල්වා මහතා දිවයිනට පැමිණීමට නියමිතව ඇත්තේ මෙම 19 වැනිදාය. ‘ලංකාදීප’ය කළ විමසුමේදී ඇමතිවරයා වැඩිදුරටත් පැවසුවේ අසන්ත මෙල් මහතා හා දැනට පත්ව සිටින තවත් එක් සාමාජිකයෙකු පමණක් හැරෙන්නට ක්‍රිකට් තේරීම් කමිටුවද ඉදිරියේදී වෙනසකට ලක් කරන බවයි.
ශ්‍රී ලංකා ක්‍රිකට් කණ්ඩායමේ ඉදිරි වෙනස්කම් පිළිබඳව ඇමතිවරයා මෙසේද පැවසීය.
“ලෝක කුසලාන තරගාවලිය අවසන් වනතුරු තමයි මමත් බලා හිටියේ. දැන් කණ්ඩායම් වෙනස්කම් කරන්න හොඳම වෙලාවයි...නමුත් මම ක්‍රිකට් පරිපාලනයට ඇඟිලි ගහන්න යන්නෙ නෑ. ශ්‍රී ලංකා ක්‍රිකට් කණ්ඩායමට ක්‍රීඩා ඇමතිවරයාටවත් ඇඟිලි ගහන්න බැරි ස්ථිර මෙහෙයුම් කමිටුවක් පත් කරන්න මම බලාපොරොත්තු වෙනවා”
“සංගක්කාර, මහේල වගේ මේ රටේ ඉහළින්ම පිළිගත් ක්‍රිකට් ප්‍රවීනයන් මේ කමිටුවේ තියන්න මම තවදුරටත් බලාපොරොත්තු වෙනවා. ශ්‍රී ලංකා කණ්ඩායමේ දැන් ඉන්න පුහුණුකරුවන් වගේම උපදේශකයන් බහුතරයකට ලෝක කුසලානෙන් පස්සේ ඉවත් වෙන්න සිදුවේවි. විශේෂයෙන්ම දැන් කණ්ඩායමේ ඉන්න පන්දු යවන්නන්ගේ පුහුණුකරුගේත් පිතිකරුවන්ගේ පුහුණු කරුගේත් සේවය තවදුරටත් දීර්ඝ කරන්න අප බලාපොරොත්තු වෙන්නේ නෑ.
ප්‍රධාන පුහුණුකරු ඉවත් වෙන්න සූදානම් නැතිනම් අපිට බලෙන් ඔහු ඉවත් කරන්නත් බෑ. හැබැයි අපිට එහෙම උනොත් අනිවාර්යයෙන්ම ඔහුට ඉහළින් තවත් පුහුණුකරුවෙකු වන උපදේශකවරයකු පත් කරන්න සිද්ද වෙනවා.
මා හිතනවා ලෝක කුසලාන තරග අවසානයත් එක්ක අසංක ගුරුසිංහ මහතාගේ ශ්‍රී ලංකා කණ්ඩායමේ සේවයත් අවසන් කරන්න.
ලෝක කුසලාන තරගාවලියේදී අපි අවනම්බු සහගත පරාජයක් ලැබුවා කියලා මා හිතන්නෙ නෑ. අපි ගොඩක්ම පසුබෑමක් ලබාගත් කණ්ඩායමක් කියලා කියද්දීත් තරග තුනක් දිනා ගත්තා. ඒ වගේම කණ්ඩායමට හොඳ නායකයෙක් හඳුනා ගත්තා. අවිශ්ක ප්‍රනාන්දු වගේ හොඳ ක්‍රීඩකයන් කීපදෙනෙකුත් හොයා ගත්තා.
shan Sunday, 07 July 2019 03:01 PM
ජනාධිපතිට පොලිස්පතිව අයින් කරගන්න බෑ.... ක්‍රිීඩා ඇමතිට පුහුණුකරුව අයින් කරගන්න බෑ.... නියම පාලනේ....
Reply 0 0
Gamini Sunday, 07 July 2019 03:41 PM
හරින් ප්‍රනාන්දු මහතාණෙනි . මෙය ස්වාධීන ආයතනයක්. ලෝක කුසලානයේ අපගේ ක්‍රිකට් ක්‍රීඩකයින්ගේ දුර්වල ක්‍රියාකාරිත්වයට ඔබ සහ තේරීම් කමිටුවේ සභාපති වගකිව යුතුය. තේරීම් කමිටුවේ සභාපතිවරයා ඔහුගේ සෙසු තේරීම්කරුවන් සමඟ සංචිතය තෝරා ගත් අතර ඔබ තෝරා ගැනීම අනුමත කර ඇත. ඉතින්, වගකීම භාරගෙන ඔබ සහ තේරීම් කමිටුව දික්වැල්ල, චන්දිමාල්, ධනංජය සහ තරුණ වේග පන්දු යවන්නන් දෙදෙනා අතහැර දැමීමෙන් ඉතා විශාල වැරදි කිහිපයක් කළ බව පවසන්න. වසර 2 කට වැඩි කාලයක් එක්දින තරගවලට ක්‍රීඩා නොකළ සමස්ත ලෝක කුසලාන කණ්ඩායම්වල පැරණිම සාමාජිකයා වන ජීවන් මෙන්ඩිස්, වැන්ඩර්සේ, තිරිමාන්න සහ අනෙකුත් ක්‍රිකට් ක්‍රීඩකයින් තෝරා ගැනීමේ වගකීම ඔබ සහ තේරීම් කමිටුව සතුය. පළමු ක්‍රියාමාර්ගය විය යුත්තේ ඔබ සහ අසන්ත ද මෙල් ඉල්ලා අස්වීමයි. දේශපාලන මැදිහත්වීමකින් තොරව එහි රාජකාරි ඉටු කිරීමට ප්‍රජාතන්ත්‍රවාදීව තේරී පත් වූ ආයතනයට ඉඩ දෙන්න. ඔබේ කාර්යය වන්නේ රටේ ක්‍රීඩාව දියුණු කිරීම සඳහා අවශ්‍ය වන නීති සම්පාදනය සඳහා පාර්ලිමේන්තුවෙන් අනුමැතිය ලබා ගැනීමයි.
Reply 0 0
Keerthi Dissanayake Monday, 08 July 2019 02:10 PM
ගරු අමාත්‍යතුමනි, කරුණාකර කුමාර් සංගක්කාර මහතා තේරීම් කමිටුවේ සභාපතිවරයා ලෙසත්, ඊළඟ ලෝක කුසලානය දිනා ගැනීමේ අපේක්ෂාවක් අපට තිබේ නම්, තේරීම් කමිටුවේ සෙසු සාමාජිකයින් ලෙස මහේල ජයවර්ධන, අරවින්ද ද සිල්වා, මුත්තියා මුරලිදරන් සහ චමින්ද වාස් පත් කරන්න.
Reply 0 0
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
